《打工仔餓底搵食團》灣仔篇 豪華咖啡茶廳：驚喜蛋牛治烘底 糧尾快食之選
每逢糧尾，想平平地「解決」一餐，傳統港式冰室都係其中一個option。今次去咗「豪華咖啡茶廳」，食咗沙嗲牛肉麵、蛋牛治烘底同燴汁雞扒飯三款港式常餐，整體味道比較平實，不過勝在價錢夠親民、出餐速度快，一個人食或者想慳下錢都係唔錯嘅選擇。
1. 沙嗲牛肉麵($28)：牛肉嫩滑偏腍
沙嗲牛肉麵可以話係港式冰室常見之選，呢度嘅沙嗲醬味道唔算突出，未有傳統沙嗲牛肉麵嗰種濃郁花生味；相對之下，牛肉夠嫩滑，肉質偏腍。麵質煮得OK，唔會過腍，整體嚟講中規中矩。
2. 蛋牛治烘底($19)：碎牛夾Juicy蛋汁
反而蛋牛治烘底有驚喜，方包烘過之後帶香脆口感，中間夾住嫩滑炒蛋同碎牛肉，牛肉同嫩滑Juicy嘅蛋汁幾夾，一啖咬落去，先有烘底嘅酥脆，再有蛋汁同嫩滑牛肉，口感味道都有層次。
3. 燴汁雞扒飯($35)：懷舊「頹飯」配厚身煎雞扒
燴汁雞扒飯走傳統港式碟頭飯路線，厚身雞扒兩面煎得靚仔香脆兼鎖住肉汁，雞肉夠嫩而調味亦OK。飯就煮得比較濕，加埋淋上色澤鮮艷嘅燴汁（茄汁），成件事好有懷舊「頹飯」Feel。
餓底評價：
豪華咖啡茶廳最大賣點係價錢非常親民，食物味道雖然整體較為平實（蛋牛治烘底同香煎雞扒值得一試），但呢個價錢份量亦足，其實都冇咩好投訴，而且出餐速度快，適合趕時間、一個人食飯，或者臨近糧尾想慳錢嘅打工仔。
價錢：★★★★★
味道：★★
份量：★★★
出餐速度：★★★★
落單方式：人手落單
支付方式：現金及電子支付
適合：一個人、趕時間、糧尾
豪華咖啡茶廳
地址：灣仔莊士敦道226號、茂蘿街1A地下
電話：2574 3069