《打工仔餓底搵食團》灣仔篇 隨變火鍋：Lunch都可以打邊爐？歡聚、聯誼之選
Lunch Time打邊爐你試過未？返工返到悶悶地，想搞搞新意、轉下口味，如果你公司食Lunch時間都彈性，可以約同事食個川式火鍋！今次走入「隨變火鍋」，佢哋午市由中午12點供應至下午4點，除咗可以打邊爐，仲有多款惹味川菜、串燒，選擇相當豐富，一店滿足唔同人口味，尤其適合Team Lunch聚餐，再望住開揚嘅灣仔一帶景致同海景歎美食，非常Good㗎！
1. 燒白($88)：川菜版「梅菜扣肉」
今次最有驚喜嘅，絕對係隱藏Menu菜式「燒白」。佢嘅賣相同風味有啲似梅菜扣肉，肉片鹹香惹味，底層鋪滿口感清爽嘅四川宜賓芽菜，夾埋一齊食啱啱好，送飯一流。
2. 小炒牛肉($88)：嫩滑牛肉配濃香芫荽
牛肉夠嫩滑，炒完帶肉香，而芫荽香氣亦非常突出，每一啖都食到芫荽香味。兩者配搭惹味又開胃，如果你係芫荽控，應該會相當滿足；但如果本身唔好芫荽，落單前就要留意喇！
3. 魚香肉絲($78)：鹹香酸辣夠醒胃
魚香肉絲集香、鹹、酸、辣於一身，味道有層次之餘亦相當醒胃。當中加入萵筍絲，帶嚟爽脆口感，配埋惹味醬汁，令人忍唔住一啖接一啖。
4. 川味回鍋肉($88)：鹹香有咬口
回鍋肉入口帶鹹香，亦吸收咗青椒同紅椒嘅香味。豬肉有咬口，肉香、椒香互相配合，非常惹味，同樣係送飯之選。
5. 泡椒三黃雞($88)：香嫩雞粒配爽滑萵筍片
三黃雞切成粒狀，肉質香嫩，配上泡椒帶醒胃香辣。萵筍吸收咗辣汁仍然保持爽滑，既可平衡辣感，配搭雞肉亦令整道菜食落更有口感。
6. 乾煸四季豆($68)：香脆爽口不油膩
四季豆炒至香脆爽口，配上鹹香肉碎，滋味相當突出。入口既有四季豆嘅爽脆，亦有肉碎帶來嘅肉香，都會係大家喜愛嘅一道小菜。
7. 午市火鍋套餐特選：豐富一人火鍋
- 海鮮火鍋餐($138/位)：配新鮮海蝦、肥美扇貝、鮮甜花甲
- 安格斯牛肉餐($108/位)：安格斯牛肉肉嫩有牛味
- 黑豚肉餐($98/位)：黑豚肉片鮮嫩滑口
火鍋湯底（任選一款：麻辣湯底、原味清湯、鮮番茄湯底、消暑冬瓜湯底）
除咗川菜小炒，午市打邊爐你又試過未？大大盤海鮮／肉類配上新鮮蔬菜，湯底選擇有辣有唔辣，照顧晒所有同事口味。
同場加映：
清爽青瓜前菜：為重口味菜式解膩
餐前奉送青瓜前菜，青瓜口感清爽，酸辣汁醒胃，正好為之後一連串濃味川菜打開胃口。
餓底評價：
「隨變火鍋」嘅川菜選擇多，調味香濃惹味，特別適合一班鍾意重口味同事嗌餸食飯，齊齊分享。想搞搞新意，午市仲有得打邊爐，對於想食得豐富嘅打工仔而言，係大滿足嘅選擇。川菜雖然普遍帶辣，但都可以要求店家減辣，所以唔食得辣都唔大問題。佢哋嘅午市供應由12點到4點，如果想約同事食一餐豐富Team Lunch，絕對係個好去處。
價錢：★★★
味道：★★★★★
份量：★★★★
出餐速度：★★★★
午市時間：12:00至16:00
落單方式：人手落單
支付方式：現金及電子支付
賣點：Team Lunch聚餐、開揚景致
隨變火鍋
銅鑼灣登龍街18號V Point 23樓
電話：2891 2787