有時開完會遲咗出去食晏，又或者有嘢趕緊，想快食夠飽肚又有滿足感，燒味飯係唔少打工仔嘅熱門選擇。「竺扶大班燒味」出餐速度快，無論一個人食定趕時間都好方便。今次試咗招牌黯然銷魂飯同燒鵝拼燒腩仔飯，由厚切半肥瘦叉燒、流心太陽蛋，到油香燒鵝、脆皮燒腩仔，全部都係好啱送飯。
1. 黯然銷魂飯($60)：厚切半肥瘦叉燒配流心蛋
黯然銷魂飯用上半肥瘦叉燒，切得相當厚身，肥瘦比例啱啱好，望落已經好吸引。叉燒口感豐腴，入口帶油香。成碟飯嘅另一個靈魂，當然係隻流心太陽蛋，蛋白邊位煎香，中間蛋黃保持流心狀態。食之前用筷子篤穿蛋黃再撈落白飯，或者蘸叉燒一齊食，蛋香、叉燒油香同肉汁全部混合，味道同口感都更有層次，亦有儀式感同夠晒邪惡！
2. 燒鵝拼燒腩仔飯($62)：一次過滿足兩個願望
燒味飯識食一定係食雙拼，一嚟食到尾唔會覺得太單調，二嚟可以試多款燒味，你又鍾意點拼？呢碟燒鵝拼燒腩仔亦係竺扶嘅招牌，燒鵝入口帶鵝皮油香，鵝肉嫩滑Juicy，鵝味突出，蘸少少酸梅醬有助中和油膩感，更加醒胃。食燒腩仔最重要嘅一定係塊豬皮，咬落「咔嚓」一聲夠清脆，單係口感已經令人相當滿足。肉質亦嫩口帶鹹香，層次分明，送白飯一流。
餓底評價：
位於唔顯眼橫街嘅竺扶大班燒味，雖然看似低調，但食物有水準，難怪Lunch Time都keep住有人等位。佢哋嘅幾款燒味都各有特色，黯然銷魂飯以厚切半肥瘦叉燒配搭流心太陽蛋，蛋汁撈飯夠邪惡；燒鵝同燒腩仔亦係佢哋招牌必點嘅燒味，嗌雙拼就可以一次過滿足晒兩個願望。
食燒味都係貪佢出餐速度快，加上整體食物份量足、價錢合理、味道有水準，對於Lunch時間有限、想快食一餐，或者一個人唔想花時間諗食乜嘅打工仔，都係方便又穩陣嘅選擇。
價錢：★★★★
味道：★★★★
份量：★★★★
出餐速度：★★★★★
落單方式：人手
付款方式：現金、電子支付
適合：趕時間、一個人用餐
竺扶大班燒味
地址：灣仔三角街2-3號華欣閣地下3號舖
電話：2892 2789 / 6927 7899(Whatsapp)