《打工仔餓底搵食團》灣仔篇 留芳雅居：精緻一人餐中菜 樓上雅座、最啱傾偈見客
食Lunch又唔一定要趕頭趕命，如果想坐得舒服啲，慢慢嘆返餐精緻中菜，「留芳雅居」會係唔錯選擇。餐廳環境優雅同有格調，無論係公司Team Lunch、約朋友傾偈，定係商務見客都好合適。今次點咗「梅韻」午市商務套餐，由前菜、湯品、主菜、時蔬、主食到甜品都一應俱全，一人一個餐可以夾返個人口味，食得自在又衞生，亦唔使咁拘緊同就住就住。
1. 「梅韻」午市商務套餐($198)：一人份精緻中菜
- 素心鮮葷三小拼（醇香泉水豆腐＋私房御味醬牛腱＋鮮瀾脆蜇頭）：三款前菜各有特色
前菜已經食到三種截然不同嘅味道同口感。牛𦟌帶少少辣，入口惹味；海蜇爽滑，配上酸辣醋汁好開胃；泉水豆腐充滿濃郁豆香，口感清新。
- 松茸燉花膠湯：精燉湯味濃郁
花膠湯入口濃郁，飲得出經過時間精燉，味道有層次。食完醒胃前菜，再飲返碗熱湯，感覺暖胃又舒服。
- 糖醋魚塊：酸甜開胃，外層香脆
糖醋魚塊外層炸得香脆，掛上酸酸甜甜嘅糖醋汁後，依然保留口感。酸甜比例剛好，令人忍唔住一件接一件食。
- 淮府糯香獅子頭：啖啖肉充滿肉汁
大大粒獅子頭，入口啖啖肉，肉質嫩口，咬開亦有肉汁，食落豐腴但唔會有肥膩感，食完好有滿足感。
- 時令炒鮮蔬（清炒或蒜茸）：清甜新鮮爽脆
炒鮮蔬保留爽脆口感，入口好Fresh，食到蔬菜本身嘅甜味。配搭獅子頭等較濃味菜式，正好平衡一下味道。
- 江南陽春小餛飩（四粒）：皮薄餡鮮
小雲吞外皮薄身，裡面嘅肉餡帶鮮味，入口細緻。作為一人餐主食，既有飽足感，又唔會過於Heavy。
- 冰鎮銀耳百合蓮子羹
是日甜品係冰鎮銀耳百合蓮子羹，蓮子羹冰涼清爽，甜度控制恰到好處，銀耳亦好爽口，配上百合同蓮子，食完感覺清潤又解熱。
2. 午市便當淺嚐 - 脆腸麻婆豆腐($78)：惹味帶辣
如果比較細食，餐廳亦有每日精選嘅午市便當選擇。是日精選脆腸麻婆豆腐，辣度明顯，麻辣夠惹味醒胃；脆腸帶蒜香，令整體香氣更突出；主食可以揀經典魚湯麵、蝦籽陽春麵或者絲苗白飯。最後揀咗蝦子麵，麵質偏腍，湯有蝦子香。
同場加映：
琥珀蓋碗手工綠牡丹($28)：清雅茶香唔搶食物味
跟餐茗茶可以用$28轉配琥珀蓋碗手工綠牡丹，茶香清雅，味道唔太濃，配搭一人餐多款菜式都唔會搶味，啱晒慢慢歎茶同傾偈嘅食客。
陳皮瓜子($18)：食到停唔到
是日餐前小食係陳皮瓜子，外殼帶有陳皮嘅甘甜香氣，瓜子肉香甜脆口。雖然只係跟餐小食，但越食越上癮，一粒接一粒，小編最後買多兩包帶走！
（溫馨提示：客人如果唔需要餐前小食，請於入座後向餐廳職員提出。）
餓底評價：
留芳雅居最大賣點一定係佢舒適優雅嘅環境，好啱商務見客、公司Team Lunch，或者單純想喺忙碌工作中搵個地方坐得舒服啲兼Hea下，一邊歎精緻中菜、一邊慢慢傾偈。午市商務套餐包括前菜、湯品、主菜、蔬菜到主食，菜式種類豐富，味道各有特色，套餐配搭完整，一人一份可以盡情揀啱自己食嘅餐單兼夾衞生。如果比較細食，可以揀店家精選嘅午市便當。
價錢：★★★
味道：★★★★
份量：★★★★
出餐速度：★★★★
落單方式：人手
付款方式：現金、電子支付
適合：商務見客、公司Team Lunch、同事聚餐
留芳雅居
地址：灣仔皇后大道東222號GARDENEast Serviced Apartments 2樓
電話：2877 7789 / 9527 1077(WhatsApp)