《打工仔餓底搵食團》灣仔篇　雄記美食：地道港式人情味小店　一人飯堂、糧尾恩物

灣仔食晏想搵間價錢相宜、食物有水準嘅小店，「雄記美食」絕對係貼地嘅選擇。雖然餐廳細細，但餐牌選擇唔算少，而且充滿港式味道，例如有牛雜（配粥粉麵飯）、蒸肉餅、東坡肉、梅菜扣肉、鴨腿湯飯、蛋煎腸粉、港式糖水，以至季節限定嘅糯米飯等等，啱晒一個人嚟醫肚，或者臨近糧尾想控制預算嘅打工仔。

1. 牛雜麵($55)：湯底清香，牛膀爽口

牛雜麵揀咗幼麵，麵條口感近似淮山麵；牛雜新鮮冇異味，牛腸夠香、牛膀爽口，蘿蔔亦煮得清甜。湯底唔鹹，入口帶淡淡胡椒香，食完成碗都唔會覺得太油膩或者飽滯。

2. 雞蛋香煎蝦米腸粉($24)：唔加醬汁亦好夠味

食腸粉通常要「混醬」（甜醬、辣醬、花生醬），但雄記嘅蛋煎腸粉完全唔落醬都好好味！因為隻蛋本身已經調味仲煎得好香，仲食得出裡面有蝦米仔同嫩滑蛋汁，令味道層次再提升，每枱必點！

3. 咖喱牛腩撈通粉（小辣）($55)：坑紋通粉掛汁，牛腩軟腍入味

點咗小辣嘅咖喱腩撈通，咖喱香濃惹味、小辣亦「有feel」，好彩有番茄中和返部份辣度。牛腩炆得軟腍，咖喱汁亦掛滿通粉嘅坑紋，每一啖都相當入味，勁match！老闆娘仲表示佢哋嘅咖喱冇加入色素，味道同樣咁濃而健康好多。

4. 香煎蓮藕肉餅飯($60)：先蒸後煎，做到外脆內Juicy

呢碗肉餅飯最特別嘅地方，在於肉餅採用先蒸後煎嘅做法。肉餅好厚身，外層煎到金黃香脆，肉汁就鎖晒喺裡面，配料有冬菇同馬蹄，增添口感同味道，食落亦冇咁易膩，一試難忘。

同場加映：低糖夏枯草清甜解膩

當日冇大家最愛嘅腐竹糖水，不過佢嘅夏枯草飲落低糖，入口順喉，配搭咖喱腩或者肉餅飯都非常解膩。食完一輪濃味食物再飲返幾啖，感覺特別舒服。

餓底評價：

雄記美食最突出嘅地方係味道非常有水準，雖然份量唔算大，但好多都睇得出係心機嘢，以食物味道質素同價錢嚟講，性價比唔錯。另外，小店亦保留舊式街坊店嘅人情味，老闆娘性格爽直幽默，閒時會同食客吹下水；店內裝修亦好特別，就留備大家自己發掘下啦！

不過由於係小店嘅關係，所以都有啲規矩要跟，例如點完餐唔能夠加單、要人齊先可以入座、最低消費人均$50、當日嘅食物賣晒亦會提早關門，所以如果想食指定食物就記得早啲到，出發前亦最好留意店方IG公布當日有冇開門營業。

價錢：★★★★

味道：★★★★★

份量：★★★

出餐速度：★★★★

落單方式：人手

付款方式：現金、電子支付

適合：快食、糧尾、一個人

溫馨提示：繁忙時間不能加單、人齊先可以入座、最低消費人均$50

雄記美食

地址：灣仔克街6號廣生行大廈B座地下B2號舖

電話：3708 8715