《打工仔餓底搵食團》灣仔篇　金雀會：隱世港式鑊氣小廚　即叫即炒、大碟夾抵食

灣仔食Lunch如果想坐得闊落，又想食到熱辣辣嘅鑊氣小炒，金雀會係個唔錯嘅選擇。呢度除咗有固定嘅午市餐單，亦有多款小菜供應（建議提前一日致電餐廳預訂），選擇豐富，而且份量十足。無論係一個人嚟醫肚，定約埋同事嚟一場Team Lunch，都非常之適合。

午市餐單：

1. 揚州炒飯($58)：即叫即炒，熱辣辣上枱

唔少餐廳為求快捷，可能會預先炒定一大盤炒飯，但金雀會堅持即叫即炒。今次碟揚州炒飯上枱時香噴噴、熱辣辣、粒粒分明，單係香氣已經相當吸引。越看似平凡嘅食物，先越考廚房嘅功架。

2. 瑤柱肉碎蒸水蛋飯($58)：滑溜有蛋香

想食得清淡一啲，可以揀每日蒸餸飯。呢碟瑤柱肉碎蒸水蛋飯，蒸水蛋質感滑溜，入口啖啖蛋香，再配上肉碎同瑤柱，為味道增添鹹香。而整體味道唔會太濃，撈飯食簡單又好味。

3. 海鮮炒烏冬($58)：配料足鑊氣夠

同樣即叫即炒，所以鑊氣足夠。烏冬吸收咗醬油炒香，入口惹味，配料有蝦仁、蟹柳、仿鮑片，誠意十足。烏冬本身飽肚亦大大碟，尤其適合嗰日唔想食飯但又胃口大嘅打工仔。

小菜類：

4. 生炒骨($118)：外層酥脆，甜酸比例剛好

如果經常會一班同事食飯，不妨考慮預訂小菜分享。呢度嘅生炒骨外層炸得酥脆，裡面嘅肉仍然保持嫩滑，食得出唔係炸定放過夜再翻熱，所以食唔到有油饐味。醬汁嘅甜酸比例亦啱啱好，開胃之餘唔會甜到膩，相當有水準。

5. 啫啫通菜($98)：惹味蝦醬但唔會死鹹

呢煲啫啫通菜用上蝦醬調味，上枱時「Jar Jar聲」兼香氣四溢，而鹹度控制得宜，唔會一入口只得死鹹要狂送飯。通菜充分掛上蝦醬嘅鮮香，亦保留本身嘅通爽口感，味道一流。

6. 當紅炸子雞（半隻）($128)：皮脆肉嫩，油香豐富

當紅炸子雞要經過繁複嘅製作工序，先可以做到外脆內嫩。呢度嘅炸子雞雞皮香脆可口、雞肉嫩滑Juicy，咬落去油香豐腴，炸得恰到好處而冇乾柴嘅感覺。如果好鍾意食炸子雞，呢款應該能夠為你帶嚟驚喜。

同場加映：自助無味精例湯，茶底亦有要求

例湯採用全自助形式，是日例湯係紅蘿蔔章魚蓮藕綠豆煲唐排，入口順喉、甘甜亦唔太油膩，飲得出冇加入味精，配搭午市餐單或者小菜都啱啱好。另外，連一杯看似普通嘅凍檸茶，茶味都好突出，問返店員原來混合咗Lipton茶葉，提神之餘亦睇得出店家對茶底有要求。

餓底食評：

價錢：★★★★

味道：★★★★★

份量：★★★★★

出餐速度：★★★★

落單方式：人手

付款方式：現金、電子支付

適合：大食量、一個人、Team Lunch及多人聚餐

溫馨提示：小菜須提早一日預訂

金雀會

電話：2893 8666