動漫迷同卡牌玩家，呢次真係要提防「跌錢」，集結四大人氣 IP 嘅 「YATA CARD FEST 2026」正式殺入觀塘 The ANGLE，現場大概會變成一個由稀有卡、角色周邊同「我真係最後買一包」組成嘅理智測試中心。
如果你係完全零概念、連卡牌點玩都未搞清，但又想無痛入坑嘅新手？「YATA CARD FEST 2026」就啱曬你！就算你純粹係動漫迷，想同角色打卡、影幾張相交功課畀 IG，呢度一樣有嘢畀你玩。
簡單講，YATA CARD FEST 唔係淨係賣卡咁單純，而係一個專門令你由「行過睇吓」進化成「點解我拎住三袋嘢」嘅大型陷阱。入場前記住同自己講：今日只係睇，唔買——然後準備好接受自己五分鐘後講大話。
四大必逛亮點
－迪士尼迷必玩：Disney Lorcana 免費體驗區
由迪士尼同 Ravensburger 聯手打造的 Disney Lorcana 到底有幾正？現場將米奇、艾莎等經典角色變身夢幻繪畫風格卡牌！仲設有免費教學工作坊，由專人教你基本戰術點玩，仲有現貨直購畀你即買即帶走！
－熱血卡牌教學交流+絕版開搶
高達 GUNDAM：特設高達卡牌專區，同場更有精緻模型展出，簡直係男人的浪漫！
Pokémon：免費教學加上玩家交換區，同場仲有推出訓練家組合包、主題套牌，連稀有收藏級卡牌都驚喜亮相！
海賊王 ONE PIECE：重頭戲嚟喇！現場直接釋出限量補充包現貨，全新 OP-17 同步展出兼發售，想搶絕版貨一定要提早入場！
－玩家交流區 & 專屬卡牌市集
設有「玩家自由交換區」，方便各路英雄現場「以卡會友」兼互相推坑；「收藏級寶藏庫」更集結多款稀有卡牌、限定禮盒、卡套與收藏冊，補貨尋寶一站搞掂～
－影相打卡位：手機 Memory 殺手區
唔打卡等於冇去過！現場除咗大型主題影相打卡位，仲集結咗精緻模型、經典積木、收藏級人偶同試手氣盲盒，唔買嘢都一定要嚟影返夠本，影到手機爆 Memory 都唔係難事！
【活動詳情】
POPUP 活動日期：2026 年 9 月 7 日至 9 月 20 日
卡牌活動日期：2026 年 9 月 11 日至 9 月 13 日
開放時間：12:00 - 21:00
活動地點：觀塘 The ANGLE 1樓中庭