荔枝角香工｜時裝天堂地庫美食廣場

去香港工業中心（香工）shopping買衫就試得多，知唔知嗰度其實都隱藏咗個美食廣場呢？喺地下嗰一層嘅中間位置有一條扶手電梯，落到去地庫係一個面積都幾大嘅美食廣場，酸辣粉、越南檬、素食、韓國菜同埋西餐都可以喺呢度搵到，非常適合血拼之後攰攰地過嚟開餐叉電，今次就試咗猛男廚房嘅西餐同埋大尚宮嘅韓式炸雞。

猛男廚房：明太子蟹肉忌廉汁扁意粉
意粉賣相唔錯，蟹肉同蟹柳都砌得好靚，美食廣場嚟講算有心思，而且份量充足，仲有埋青瓜沙律同埋忌廉湯，CP值都算好高 👍🏻 忌廉湯仲跟埋梳打餅，幾有心思；主角意粉大大碟，有兩大條蟹肉，蟹籽同芝士粉都好多，忌廉汁都幾香口，不過就偏稀，整體質素唔錯，食完唔會覺得好漏

CP 值：⭕️⭕️⭕️⭕️ 3.7/5

猛男廚房 (荔枝角)
荔枝角青山道489-491號香港工業中心C座地庫C1B3A號舖

大尚宮：雙重滋味炸雞（半份）
份量十足嘅一個炸雞，估唔到半份嘅份量都咁多，新鮮炸起嘅雞件上面鋪滿咗醬油、芥末醬同埋芝麻紫菜，調味嚟講做得好好，而且個雞都炸到外脆內嫩，美食廣場嚟講質素真係唔差，不過佢個雞件真心堅大件，睇到碟雞咁大碟，以為有好多件，其實係四大件，但就真係食得好過癮，仲發現咗成隻炸大雞髀，佢仲要跟埋湯同泡菜，都幾值得一試。

CP 值：⭕️⭕️⭕️⭕️ 3.6/5

大尚宮 (荔枝角)
荔枝角青山道479-491號香港工業中心C座地庫C1B-5號舖

TIPS：附近好多工廠大廈同寫字樓，所以午餐時間都好多人，通常大概12:00左右過嚟就比較容易搵位，食物普遍份量都幾大，味道都唔差，而且出餐都好快，如果過開嚟呢度買衫，可以不妨嚟試吓 🙌🏻

香港工業中心
荔枝角青山道 489-491 號