【疫後旅遊提案】日本岡山德國農村主題公園│賞四季花田坐10米高鞦韆

旅遊 2021-06-24

坐鞦韆、睇卡通片係好多人童年樂趣之一。日本岡山縣一個以德國農村為主題嘅公園，除咗以四季花田作賣點，更新設置10米高飛天鞦韆，讓人變身《飄零燕》主角海迪，飛上藍天白雲，欣賞充滿德國風情嘅美景，一次過回味兩個童年難忘回憶。

Okayama Forest Park (おかやまフォレストパークドイツの森) 位於岡山縣赤磐市，距離岡山站約50分鐘車程。公園以中世紀德國農村為主題，磚砌歐式建築係打卡最佳背景。另外，園內有多間餐廳、食店及攤位供應自製香腸、石爐麵包、啤酒等地道德國美食，讓遊人身在日本也能體驗歐遊嘅樂趣。

公園以中世紀德國農村為主題。

磚砌歐式建築係打卡最佳背景。

自製香腸

石爐麵包

公園另一吸引遊人嘅原因，就是四季花田有不同花卉盛開，春天種油菜花、鬱金香、粉蝶花；夏天種向日葵；秋天大波斯菊綻放，色彩繽紛，目不睱給，令人任何季節都有衝動入園欣賞。

公園四季有不同花卉盛開。

走入農場，除了親親大自然外，公園內飼養咗羊駝、山羊、小馬、迷你豬和兔子等小動物，遊客可與動物來個零距離互動接觸。2021年3月，動物成員更加入袋鼠。如果你係愛狗之人，公園內設有日本西部最大嘅狗公園，總面積約5,000平方米，既有狗運動場，也有大小型狗專區。好多當地人帶同愛犬去耍玩、散步。

遊人可近距離接觸多種動物包括羊駝。

至於公園人氣最強遊樂設施，必定係10米高飛天鞦韆。呢個鞦韆更係日本首個被《阿爾卑斯女孩海蒂》(港譯《飄零燕》)認可。坐上鞦韆，蕩上高空，有如變身海蒂，感受一下像小鳥一樣無拘無束嘅自由快感。由於飛天鞦韆實在太受歡迎，而且好多人玩到唔捨得走。公園由2021年3月1日起開始推行收費制，每次200日圓。每次最多2位成人一起玩，小童必要有成人陪同先可以玩。鞦韆開放時間為平日中午1時至2時，星期六、日及假期共有3節：上午10時半至11時半、下午1時至2時及3時至4時。每日限40人，門票在活動開始前15分鐘開賣。