【飲食情報】深水埗馳名正宗古早蛋糕│無燶底燶邊糕面堅挺不下陷
古早蛋糕店開到成行成市，間間自誇正宗，但點至係古早味呢？深水埗「囍源」出品嘅古早蛋糕，件件質地鬆軟又濕潤，出爐一段時間後糕面都唔會皺皮下陷，更重要係絕無燶底，呢啲先係真正古早滋味！
去年先開業嘅「囍源」，雖然舖面被前排的檔販擋住，但很多識途街坊都會專程到來買古早蛋糕。負責人Carol：「選擇在深水埗開店，一方面舖址近地鐵站，人流較多，亦方便區外人嚟買蛋糕；另一方面，古早蛋糕口味懷舊，對年長街坊嚟講係一種回憶，亦能帶來部分客源。」
囍源古早蛋糕賣嘅係懷舊口味，但店面裝修卻有一點新潮感。
古早蛋糕論賣相，實而不華，不似得新潮西式蛋糕加上水果、忌廉等物作裝飾，花巧奪目。雖然平凡得很，但簡單味道更叫人難忘。「古早蛋糕材料很簡單，只有雞蛋、麵粉、油和牛奶。入口嘅就係食材原始嘅味道。」Carol又話，好多人將古早蛋糕、海綿蛋糕和戚風蛋糕嘅混淆。「驟眼睇3款蛋糕好似樣，但製作方法有分別。古早蛋糕通常直接食用，不會加忌廉或水果等，質感方面比較濕潤綿密，食完唔會有喉乾要立刻飲水嘅感覺。新鮮焗起嘅古早蛋糕非常鬆軟，即使擺放三至四日仍然有彈力。最重要一點係古早蛋糕焗起後無燶底燶邊，而且糕面不會皺皮下陷，全件由底至面都係軟身且可抖動。」
所有蛋糕每日新鮮焗製，賣晒就無，絕不留過夜。
正宗古早味蛋糕以水浴法焗製，蛋糕無燶底亦無燶邊，全件軟身。
古早蛋糕無添加防腐劑等化學成分，一般只能存放3天。
古早味蛋糕質感綿密具彈性，而且比較濕潤。
囍源古早蛋糕以水浴法低溫烤焗3小時，而且堅持少糖少油，以最健康方法製蛋糕。開舖前，廚師專程到台灣學藝，期望將最正宗口味嘅古早蛋糕帶來香港；另外為了從台灣訂製專用焗爐回港，前後花了3個多月時間。囍源古早蛋糕每日供應至少10款口味，在不同時段出爐供應。原味每件$55，其他口味每件$70至$85。
囍源不斷研發新口味，牌上列有嘅口味都接受預訂，只要2日前預訂，1件都造。
「巨無霸」係囍源嘅人氣口味，蛋糕有2層或以上，食感更豐富。只限星期六及日供應。
囍源特別訂造多款字模，免費為客人在蛋糕上烙印字款如：生日快樂等。
不少客人預訂全底古早蛋糕作生日蛋糕。
店內有售支裝朱古力醬，客人可購買自行在蛋糕上寫祝福字句。
外賣盒上特別加設「通風口」，避免新鮮出爐蛋糕因蒸氣而影響食味。
最受歡迎古早蛋糕口味
第1位 芝士肉鬆
芝士香氣十足，肉鬆增加食感及鹹香，兩者配搭，提升食味。
第2位 特級骯髒朱古力
添加朱古力、七彩糖粉、穀物片等，望落甜度十足，但入口甜味平衡，不會過膩。
第3位 拉絲芝士
以日本芝士醬、意大利水牛芝士及英國車打芝士混合成醬做夾心餡料，芝味濃郁。
INFO
囍源古早蛋糕
地址：深水埗北河街123號
電話：2669 9888
營業時間：上午11時半至晚上10時
Text: Josie Yan
你或會有興趣的相關文章：
【飲食情報】人氣日系輕食店進駐屯門│高顏值梳乎厘/熱香餅/咖啡
【飲食情報】筲箕灣新餐廳主打Dirty？│放低儀態體驗messy吃喝