【健康Tips】夏天雨季來拒絕人蚊大戰│小編實測5種天然驅蚊法點評

最近多雨，蚊特別多，大家有無中伏？廣東深圳有一名男網友因為被蚊折磨到瞓唔到覺，佢忽發奇想，將打死嘅蚊製成標本，顯示人蚊大戰嘅戰績。夏天雨水多蚊都多，唔想被蚊咬，驅蚊妙法你要知！市面上有各種驅蚊產品，不過當中含有大量化學成份，多用不利健康。驅蚊堅持用天然方法，邊種work？根據小編個人經驗，有以下結論。

燒柚子皮乾

掂！非常掂！一點著柚子皮乾，煙到地方蚊即閃。唯一缺點係柚皮點著後，煙比較濃烈，而且陣味幾強，必要保持通風，而且不宜太長時間，否則外人誤會你屋企著火。

柚子皮乾製法很簡單，就係將食剩嘅柚皮曬到乾透或放入焗爐烘乾。用太陽曬方法較好，但時間要耐啲。用焗爐嘅話必要小心火力控制，太熱柚皮會燒著變燶。

燒艾草

同樣好work，不過艾草陣味唔係人人鍾意或頂得順。坊間有現成嘅艾草蚊香賣，自製都好簡單！材料有艾絨和綿紙。先把綿紙捲成筒狀，將其中一端扭緊，然後在筒內放入艾絨，可用免洗筷子將艾絨整得緊實，填滿綿紙筒後，將封口扭實完成。

種防蚊植物

具有驅蚊作用嘅植物都散發強烈香氣，例如薄荷、天竺葵、香茅、艾草等。種植物可同時綠化家居，一舉兩得。但驅蚊效果只係一般，如果忽略清理盆底積水，反而更惹蚊。

搽精油

塗搽薰衣草精油、天竺葵精油、檸檬草精油、薄荷精油、廣藿香精油等都有驅蚊作用，不過小編覺得效果一般，多數人接受呢種方法，只不過精油陣味幾醒神，搽咗驅蚊又當香薰用。但住在郊區，呢啲精油唔係好保護到你。

木夾浸花露水放風口

小編曾經睇過一篇舊新聞，黃大仙區浸信會天虹小學曾以木夾浸花露水夾喺冷氣機風口嚟驅蚊。花露水因含驅蚊脂，對防蚊有一定作用，而且散發陣陣清淡花香，非常怡人。就算天氣未熱到要開冷氣，用同一招可以將木夾夾喺風扇，一樣發揮驅蚊和令室內飄香之效。但要留意花露水主要成分係乙醇，屬易燃物品，而且燃點非常低。如在屋內噴灑，記住切勿在火種附近噴。如果噴咗喺身，亦唔好立即去廚房煮飯，要等一陣酒精散咗先。

Text:  Josie Yan

你或會有興趣的相關文章：

【飲食情報】太古城中心新開餃子 專門店│現場人手擀皮隻隻餡料足本

【飲食情報】西環高質咖啡小店升級進駐上環│朝聖必試$180 Ninety plus