【疫後出遊計劃】一生人旅遊清單必賞極光│塔斯曼尼亞南極光全年都有

極光係地球一種大規模嘅放電現象，能量釋放時產生嘅光芒，絢麗夢幻。在北半球睇到嘅極光稱為北極光，在南半球睇到嘅就係南極光。澳洲塔斯曼尼亞係其中一個觀賞南極光嘅最佳地方，而且全年可見。疫情關係未能外遊，暫且眼睛去旅行，從相片中欣賞南極光之美。

塔斯曼尼亞位於澳洲嘅東南面，係澳洲唯一嘅島州。人口只有約50萬，島上除咗有美麗嘅港灣、潔淨嘅空氣、奇美嘅自然生態，更可欣賞到難以捉摸又絢麗奪目嘅南極光。南極光帶綠、黃、藍和紫色，色彩跟北極光有啲不同，更重要係在塔斯曼尼亞，一年四季都有機會睇到，唔似北極光只季節性出現。

塔斯曼尼亞自然景觀奇美，而且全年可賞南極光。

雖然南極光全年可見，但想捕捉最美嘅一刻，建議在當地冬季5至8月，以及9月份立春前後，在較少光害嘅地方觀賞。入夜後，天空和四周漆黑一遍，在天清情況下，更易睇得到南極光劃破長空嘅優美景象。南極光以外，更以見到滿天爍星星和清澈銀河嘅奇景。

塔斯曼尼亞有多個公認觀賞南極光嘅好地方：

1.荷伯特及周邊

數名氣最盛嘅，威靈頓山當然係其一觀賞地，但荷伯特周邊其實有其他等待南極光出現嘅秘點。距離荷伯特只需15至20分鐘車程嘅Kingston Beach，安全又寧靜，當地人大讚呢區富有田園氣息，花啲心思構圖取景，可以影到不一樣嘅南極光。

另外，由荷伯特揸車約40分鐘，經過塔斯曼大橋就到達南灣半島。島上分南灣和Opossum Bay兩區，因為全無建築物，視線寬闊，極光一出現就有機會睇到。

塔斯曼尼亞擁有美麗嘅海岸線，島上有多個美麗嘅海灘。荷伯以東南40公里係Clifton Beach，咪以為呢個係普通沙灘，因為呢度四周夠黑，無光害，因此成為觀南極光熱門地點。而且因海面波平如鏡，唔少人專程嚟影張南極光倒影相。

 2. 東海岸　

東海岸係著名健行地方，唔同年齡人士可按個人體力和目標，選擇唔同行山難度和距離，都能享受到樂趣。被喻為「世外桃源」嘅菲欣納國家公園，內有唔少短途健行路線，適合唔同能力旅行者。延綿數里嘅白沙灘，四周僻靜，讓人在不受騷擾下靜心細賞南極光嘅美。

阿莫斯山係菲欣納半島上一個隱蔽地方，識途之人會登山從高觀看酒杯灣，晚上更有機會見到南極光和銀河一起出現景象。

3. 布尼島

布尼島全長50公里，由北及南兩島連成，兩島之間狹地峽稱頸項，卻是最多野外動物活躍嘅地方。位於布尼島最南端嘅布尼角燈塔，1838年已開始運作，目前是全澳洲第二古老仍有人看守和控制嘅燈塔。以燈塔作背景，配上幻彩色嘅南極光，拍出來嘅相片效果很美。

距離荷伯特約50公里嘅Port Huon，係著名嘅遊艇停泊地，著名塔斯曼尼亞蘋果都係經呢個港口運往其他地區。如果想前往哈茨山國家公園 睇野生動物和山巒景色，亦可由呢度出發。

 4. Northwest Coast

想睇到塔斯曼斯尼廣闊又原始嘅風景，就要前往西北海岸，羅蘭山、桌角、在斯丹尼嘅長方形大堅果岩等都係遊覽熱點。芸芸之中，搖藍山聖佳爾湖國家公園 係塔斯曼尼亞世界文化荒野遺產區嘅瑰寶，既有嶙峋山脈，又有在冰河時期造成嘅湖泊和冰冷溪流，湖畔還滿佈古老松樹，自然景色叫人讚不絕口。

 在塔斯曼尼亞，不止睇山睇水睇石，原來仲有花田！每年9月26日，位於卓角嘅鬰金香花田對外開放，一直到春天尾聲10月底。逾14公頃花海，七彩繽粉，了無邊際，晚上仲可觀星和賞南極光。

INFO

https://www.australia.com/zh-hk/places/tasmania.html

Text:  Josie Yan

Photo：塔斯曼尼亞旅遊局 

你或會有興趣的相關文章：

【周末好去處】大埔鳳園蝶豆花園親飼小羊駝│大埔墟港鐵站轉小巴直達門口

【玩樂好去處】假日踩單車2小時遊沙田│橙色天橋打卡烏溪沙賞日落