【飲食情報】新蒲崗小店六星酒店廚主理│手造意粉麵包打響名堂

疫情下經營倍添困難，唔少小店出盡全力撐。位於新蒲崗Mikiki商場內嘅My Way Cafe，老闆疫情期間晚晚捱到通宵，但憑著出色美味嘅手造意粉和麵包，得到食客支持作回報，甚至有「區外客」一星期揸車嚟幫襯5至6天。

年輕人創業，大都因為心中有團火。人到中年才創業，多數希望在事業上再尋理想。My Way Cafe店主Joey就係其中一個例子。人生事業前半部，在西廚業打滾二十多年，曾在Chez Patrick、La Masion 和六星酒店任廚師，擁有亮麗嘅工作經驗，另外，佢亦曾獲取「大廚出馬」和「金馬廚」等獎項，廚藝有一定功架。到了人生事業下半場，佢想追尋自我，創出自己風格，在妻子大力支持下，佢決定創業，把餐廳當作「家」，希望食客以平民價歎到酒店級滋味。

My Way Cafe經常播著店主Joey最喜歡嘅Beyond 歌曲。

由於店主喜歡塗鴉藝術，特別請來AfterWorkshop本地塗鴉畫家繪畫，在主題牆畫上店主最愛嘅貓頭鷹、海豚和變色龍。

My Way Café主打係手造意粉及麵包。Joey日花兩小時搓麵粉，採用韓國麵粉和日本雞蛋，意粉條條充滿蛋香和心思，富嚼勁，新鮮美味，而且無添加，食得安心。另外，佢更破格地將正統西餐配港式咖啡廳奶茶，迎合港人口味。

特色海膽幼蛋麵係不計成本之作。採用加拿大和韓國兩地海膽，令口感更富層次。汁醬以加拿大海膽加入龍蝦湯和忌廉煮成，甘香豐膄，啖啖超鮮零腥味。$218

八爪魚番茄醬自家製蛋麵 係大廚巧手之作，八爪魚切碎配番茄醬煮，入味而不過韌，啖啖番茄海鮮香。$138

蟹肉龍蝦汁幼蛋麵 ，美味之源在汁底。汁底以澳洲波士頓龍蝦熬煮2日而成，配進口加拿大蟹肉，手造意粉吸汁力強，每啖都嚐到龍蝦嘅鮮甜。$158

浦燒日本鰻魚意大利飯係食味創意示範。精挑肥嫩厚實、肉質甘甜且膠質豐富嘅日本鰻魚，魚皮被炙燒至金黃散發濃郁油香，特調秘製浦燒汁味道濃甜不過鹹。$158

北海道豚肉配蘋果薑汁 ，油脂豐富但爽口嘅北海道嫩滑豚肉，配以薑、青蘋果、百里香、香葉和白酒等煮成嘅醬汁，肉鮮味提升。$228

手造麵包係呢間餐廳嘅人氣點選菜式。

INFO

My Way Café

地址：九龍新蒲崗太子道東638號Mikiki Shop G03C

營業時間：上午11時30分至晚上10時

Text:  Josie Yan

你或會有興趣的相關文章：

【飲食情報】大角咀西式濃湯輕食店│本地/素食/低碳/無麩質

【飲食情報】悉尼人氣越南湯粉店進駐西營盤│30斤牛骨熬湯每日新鮮製