【飲食情報】大角咀西式濃湯輕食店│本地/素食/低碳/無麩質

飯餐時間，但有時未必餓到想食好多，只想飲碗熱湯、食塊麵包，或者加個沙律，已覺足夠。大角咀有間新派輕食店，提供市場上少有嘅西式濃湯輕食套餐，並以本地食材、低碳、無麩質和素食為主打，用最健康嘅製作方法，帶來輕盈美味全新餐飲體驗。

「壹杯SUPU」其實係「壹碗壹碟」主理人嘅新搞作。由於有見香港人對素食愈來愈接受，而且又覺得香港人生活壓力大，應該對自己身體好啲，一班年輕嘅廚師於是萌生炮製對身體零負擔嘅健康輕食念頭。

「壹杯SUPU」在「壹碗壹碟」原址重開，帶來清新嘅餐飲新體驗。 

講少少關於店名嘅由來。「壹杯SUPU」嘅「SUPU」，係日文「湯」嘅讀音。全店走日系清新風格，配合素食給人嘅清新感覺。店舖只設立食或外賣，另外，更推出可以外賣拎走嘅「急凍湯」系列。每杯「急凍湯」經由真空加急凍處理，保質期更加長達3個月。

「壹杯SUPU」主打市場上少有嘅西式濃湯輕食套餐。

「壹杯SUPU」只設立食或外賣，但推出「急凍湯」，方便大家拎濃湯返屋企慢慢歎。

「壹杯SUPU」廚師團隊擁有多年酒店餐飲及米芝蓮兩星餐廳經驗，廚藝功夫有一定水準。佢哋堅持使用每日新鮮運送食材，製作絕無添加味精嘅西式濃湯。食材優質，煮出嚟嘅湯更滋味，廚師們更盡力使用本地食材，並會定期落田嚴選季節性作物，確保食材質素。用來裝飾用嘅食用花，都係本地姨姨姐姐親手種植 。小店盡綿力，全力支持本地農業和農夫。

甘筍薑湯口感清爽，甘筍清甜，本地薑微辛辣，呢排香港天氣又濕又熱，飲呢款湯最啱。 $38/300ml；$58/500ml

近期芫茜大熱，芫茜濃湯以新鮮芫茜打成，「茜」味濃郁，滿足一眾「好茜之人」。呢款湯係限量供應架！  $38/300ml；$58/500ml

紅菜頭西芹湯顏色靚，加入西芹同煮嘅濃湯，味道有意外驚喜。$38/300ml；$58/500ml

西式濃湯以大量新鮮蔬菜熬製，將蔬菜嘅鮮甜原汁原味奉上，絕無添加味精，甜而不膩，啖啖都係蔬菜嘅精華。每月至少有3款全素濃湯選擇，滿足不同口味嘅你。

薯仔大蒜湯使用本地薯仔加大蒜攪拌而成，大蒜味超香，薯仔加添濃湯綿滑口感。$38/300ml；$58/500ml

南瓜藜麥湯色澤金黃，入口軟綿細滑，但夾雜點點藜麥嘅嚼頭，食味層次豐富。$38/300ml；$58/500ml

黃金海膽湯係4月限定湯款，海膽熬湯，未飲已知係鮮到無比。難得係一啲醒味都無，鮮香甘甜，超乎想像。每踠都有原片海膽浮台，飲前一定要打卡。呢款湯不設外賣及凍湯。$88/300ml

 濃湯以外，「壹杯SUPU」提供低碳嘅「本地菜沙律」，營養均衡，簡單健康，對健康零負擔。

小米青口沙律將本地沙律菜混合容易消化吸收及營養價值高嘅小米，再加上帶有獨特鮮味同海水味嘅青口，口感超級豐富。$35(單點)/$25(套餐)

廚師嚴選時令本地菜製成野菜沙律，食入口嘅唔止蔬菜嘅鮮甜，更係珍貴嘅本土味。 $30(單點)/$20(套餐)

除咗西式濃湯同沙律之外，「壹杯SUPU」亦有多款「法式麵包」。

青橄欖包 $20(單點)/$15(套餐)

小法包 $20(單點)/$15(套餐)

無麩質原味卷 $22(單點)/$28(套餐)

INFO

壹杯SUPU

地址：九龍大角咀角祥街2J舖

電話：5722 8983

Text:  Josie Yan

你或會有興趣的相關文章：

【飲食情報】日本燒牛丼元祖登陸旺角│即叫即燒鐵板燒烤牛/豚肉

【飲食情報】網上預訂5星酒店4人8道菜套餐│每人$247歎冬瓜盅/片皮鴨/鮑魚