香港國際電影節首推網上觀影證│ 4K數碼修復王家衛4大名作

Focus 2021-03-17

疫情改變我哋嘅生活，睇戲嘅方法都係。為期12日嘅第45屆香港國際電影節將於4月1日開鑼，今年首度以實體及網上混合模式舉行，影迷除咗可以買票入戲院睇精選嘅190部好戲，亦可選擇安坐家中慢慢欣賞近60部佳作。

影迷想喺坐喺屋企慢慢欣賞香港國際電影節其中60部好戲，方法好簡單，只要上HKIFF45 ONLINE網上放映平台（www.hkiff.org.hk）建立帳戶，就可以信用卡購買網上門票及網上觀影證。完成交易後便可於放映期內觀賞已選取嘅電影，電影放映期最多為72小時（首天的00:00至第三天的23:59）。影迷可於期間隨時觀看，不過開始播放後，須於24小時內完成。要留意！HKIFF45 ONLINE內容僅限香港地區於電影節期間（2021年4月1日至12日）觀看。另外，網上觀影證限量發售；平台上嘅各電影設限額，先到先得。

香港國際電影節首次推出網上觀影證。

在HKIFF45 ONLINE網上放映平台唔止可買到網上觀映證，亦可買到今屆電影節嘅網上門票。門票發售日期由3月18日上午10時起。至於戲院門票，則可在各大城市售票網或MCL Cinema嘅網頁、流動購票應用程式、K11 Art House票房（只限K11 Art House放映場次）購買。除此之外，影迷亦可於城市售票網購買影迷通行證，觀看所有文化中心、大會堂及HKIFF45 ONLINE嘅放映。

網上放映時間表

講返今屆電影節嘅內容，為咗紀念澤東電影成立30周年，特別設有「澤東三十念念不忘」專題節目，為影迷帶來全新修復嘅王家衛代表作，包括：《墮落天使》（1995）、《春光乍洩》（1997）、《花樣年華》（2000）及《2046》（2004）。澤東把電影以4K數碼修復，唔止回復電影當年公映嘅原貎，更呈現當初因技術限制而無法實現嘅聲畫效果，實踐王家衛嘅創作初衷。4部經典將在香港文化中心大劇院放映，各只映1場。