沙田市中心燒烤樂園│套餐包工具 / 親手燒乳豬

多數燒烤場位於偏遠地方，交通不便，搭車去一般好轉折。不過，近日沙田有個燒烤場卻位於鬧市中心，仲要位於天台花園，座擁無敵城門河景。呢個聲稱「全港首個戶外港式燒烤樂園」，提供單點及套餐選擇，如果點套餐包埋燒烤用具，為即興想燒嘢食又唔想花時間做準備嘅人帶嚟超級方便。

如果你係沙田友，應該知道沙田大會堂上面有個花園平台，呢度曾經係西餐廳，亦做過婚禮場地。處身天台，可飽覽城門河景，風景優美。最近，天台花園再變身，已改為燒烤樂園Pop n’ Grill，為大眾帶來交通便捷嘅燒烤地點。

Pop n’ Grill位處沙田市中心，讓人一邊燒嘢食，一邊欣賞優美城門河景。

市場上嘅燒烤樂園多數採用自助模式，但Pop n’ Grill則有所不同。食客只需在點餐紙下單，付款後服務員便會馬上把食材送上，如果唔懂起爐，更可代你效勞。想燒烤又懶得郁手，餐廳亦提供代客燒烤服務。

外區人搭車嚟呢個燒烤樂園，坐港鐵在沙田站落車，穿過新城市廣場，步行數分鐘即可到達。

Pop n’ Grill提供嘅燒烤食材幾多元化，以肉類為例，各式經常食到嘅扒類齊全，用嚟燒烤嘅肉更由廚師以自家秘方醃製，人氣之選有川味雞扒、燒汁金沙骨、土匪雞翼、黑椒牛扒和韓式牛仔骨等。想要特色嘢，可選豬手、斧扒等，甚至全隻乳豬。

「招牌土匪豬手」用孜然粉和川椒等獨家袐方醃製 48 小時，以炭火燒烤，麻香辣味很誘人。$188

澳洲 M5 和牛戰斧扒重達2磅，咪睇大大件，肉質出奇鮮嫩，牛扒有牛扒味！$728

想挑戰燒烤最高難度，只要3日前預訂，就可大展身手燒乳豬。餐廳預先把乳豬串上架，你只要在炭爐前轉動乳豬，約30分鐘就有得食脆皮乳豬食，零失敗。$688

Pop n’ Grill不但滿足「食肉獸」，亦照顧愛鮮一族嘅食欲需求。海鮮食材有很多，如肉質肥美的美國龍蝦尾、原汁原味嘅生蠔、帶子、紐西蘭青口等。至於港式燒烤必備嘅肉丸和腸類及各式新鮮蔬菜，一樣有多款選擇。

海鮮食材選擇有很多，人氣之選有肉質肥美嘅美國龍蝦尾。

燒烤食材逾60多款，無論愛食肉、海鮮或素食者都照顧到。

喜歡燒烤嘅人，除咗鍾情炭火燒烤嘅美味，仲係「貪心鬼」。心大心細唔知揀乜嘢燒好，呢度準備咗兩款「懶人套餐」，食材包羅萬有，一次過滿足你不同願望。所有燒烤套餐均已包爐具、炭、燒烤網及夾、蜜糖及調味醬料和餐具。

「歡歡樂樂二人餐」有燒汁金沙骨、香茅豬排、川式雞扒、土匪雞翼、司華力腸、爆脆芝士腸、牛丸、墨魚丸、貢丸、香甜粟米、蕃薯和蒜香雜菇共 12 款美食。星期一至五 $298；星期六，日及公眾假期 $398

「豪情萬里二人餐」包括美國龍蝦尾、紐西蘭青口、即開生蠔、半殼帶子、越南虎蝦、土魷、蕃薯、菠蘿和蒜香雜菇。星期一至五$498；星期六，日及公眾假期$638

在Pop n’ Grill燒烤，無論單點或叫套餐，都係免收加一服務費。單點食物或飲品只要滿$600 即送 1 套二人用燒烤工具包 ，有齊燒烤爐、炭、燒烤夾和網、蜜糖及調味料和餐具。另外，滿$300 或點選燒烤套餐，就可以每位$108 無限添飲指定啤酒、紅白餐酒、汽水及飲料。

INFO

Pop n’ Grill

地址：沙田源禾路 1 號沙田大會堂天台花園

營業時間：星期一至日上午11時至晚上10時

電話：3188 5170

Text:  Josie Yan

你或會有興趣的相關文章：

KAKAO FRIENDS復活節現身沙田│亂闖藝術館盞鬼演繹世界名畫

NESCAFÉ聯乘日本京都設計品牌SOU・SOU │和風生活小物限量換購