灣仔慢活主題咖啡店│香港本土食材煲咖啡

咖啡店係好多人嘅「偷閒加油店」，最近灣仔又有新咖啡店開業，為喺呢區工作或生活嘅人帶來放下腳步、喘息嘅空間。Bow Coffee以「呼吸、慢活」為主題，除咗在店舖室內設計花心思，給人舒適悠閒嘅感覺，更在堂食餐具上暗藏打氣字句，裡裡外外為繁忙嘅香港人加油。

近年好多新開嘅咖啡店皆以純白為主調設計，突出其簡約形象，但Bow Coffee卻走另一種格調，裝潢以藍綠色為主調，搭配木系家具及特色牆，營造一種溫暖共聚嘅空間。

Bow Coffee裝潢以藍綠色為主調，形象鮮明突出。

Bow Coffee取名別有用心，以廣東話「煲咖啡」命名，因為咖啡店不止賣格調，仲希望成為一個新舊文化交融嘅空間，把灣仔蘭杜街媲美深水埗大南街，塑造成社群聚腳地。

Bow Coffee營造出簡約溫暖的共聚空間。

Bow Coffee為繁忙嘅香港人帶來喘息休閒嘅空間。

無論裝修、環境、主題有幾獨特，始終咖啡先係咖啡店嘅真正主角。Bow Coffee嘅咖啡特色之一係配搭香港本土食材，支持本土產業。

「Bow Coffee 煲咖啡」選用採自香港本地原生樹嘅原蜜製作，咖啡嘅甘苦味突出咗蜂蜜嘅花蜜味，增添「蜂」味。$ 48

「Live & Breathe 醒味」以清甜西柚蘇打水配搭Bow Coffee嘅精選優質咖啡，微酸味很醒神。$48

「煙硝紅茶(正山小種)/雲圖綠茶(盧山雲霧)/佗寂白茶(白牡丹)」係Bow Coffee與瑜茶舍合作，通過選擇不同清香甘甜嘅香茶設定不同意境，讓人在咖啡店享受忘卻世俗煩囂嘅品茗時光。$ 45

香濃嘅咖啡獨享雖美妙，但能配上美食，享受更佳。Bow Coffee在食物創作都落咗一番苦功，清新又健康，讓人好好享受慢活生活嘅樂趣。 

 「Bow Coffee 貝果」，由T.H.E Deli Blendit供應，手工製嘅貝果口感略帶嚼勁，配合精選嘅蘸醬及配料，美味滿分！$35-$68

「酸種麵包多士 」可配蘸醬及配料：忌廉芝士、煙三文魚或當日特選口味。利用天然酵母製作嘅酸種麵包不含額外添加物，升糖指數亦相對較低，適合追求飲食健康嘅人。$35-$68

INFO

Bow Coffee

地址：灣仔皇后大道東58-64號

營業時間：星期一至六上午 10時至下午4時

Text:  Josie Yan 

你或會有興趣的相關文章：

本地品牌原創設計家居精品│可摺瑜伽墊 / 印花浴墊 / 2合1抱枕

日本宮崎金桔完熟甜美│西營盤咖啡店自製果醬沖咖啡