日本宮崎金桔完熟甜美│西營盤咖啡店自製果醬沖咖啡
不時不食,水果當然時令嘅最靚最甜。最近除咗台灣鳳梨當造外,日本方面,金桔都到咗成熟時。好多人對金桔嘅食味印象係酸,但其實完熟嘅金桔都係甜嘅,當然嗰種甜有別於士多啤梨或提子之類,但嗰種甜中帶酸嘅清新感,會令你好難忘。
西營盤最近開咗間名叫「TIL – Today Is Long」嘅澳式咖啡店,佢哋同日本金桔年產No.1嘅宮崎縣合作,將完熟金桔與咖啡嚟個crossover。聽落係咪好有創意,覺得好新鮮呢?咖啡味甘苦,金桔甜中帶酸,兩者好似大纜扯唔埋,但夾埋一齊竟然very nice。
TIL – Today Is Long位於舊建築林立嘅西營盤,由於店舖外牆白雪雪,與周遭建築成強烈對比,非常突出。
TIL – Today Is Long咖啡店裝潢簡潔明亮。
今次期間限定有兩款推介飲品。「Kumquat Ristretto Tonic 」用上上自家製完熟金桔「TAMA TAMA」果醬加上Tonic Water及單品豆雙份濃縮咖啡。建議先唔好心急攪勻,呷一口,試試咖啡嘅香及酸,以及金桔果醬嘅甜。之後攪拌,就可以試到兩者合二為一嘅味道層次有幾豐富和美妙。
Kumquat Ristretto Tonic $55
另一款飲品係Sparkling Kumquat Soda,自家製完熟金桔「TAMA TAMA」果醬加冰、梳打水及青檸汁。味道很清爽,感受到春夏嘅朝氣。金桔甜美,飲落有啲潤喉感。
Sparkling Kumquat Soda $45
以完熟金桔製成嘅果醬,除咗用嚟沖飲品,當然最佳配搭係麵包。餐廳在牛角包內加入「TAMA TAMA」果醬,然後壓成鬆餅Kumquat Croffles。香濃牛油香加上如窩夫般嘅質感,帶來嶄新食感。呢款甜點有兩種口味選擇:一款配搭牛油果蓉、紅椒粉及金桔片;另一款係蛋白霜加入檸檬並炙燒。兩款甜點各有特色,給你甜味新體驗。
Kumquat Croffles $48(單件) / $88(兩款組合)
INFO
TIL – Today Is Long
地址:香港皇后大道西 172 號建興樓地下
營業時間: 07:30 - 18:00 (星期一至日)
Facebook: https://www.facebook.com/Todayislong
Text: Josie Yan
你或會有興趣的相關文章:
本地品牌原創設計家居精品│可摺瑜伽墊 / 印花浴墊 / 2合1抱枕
6餐廳聯乘Hello Kitty美食地圖│限定主題美食 / 換購襟章及咖啡杯