和民極平版Omakase $160歎8道菜│帝逸酒店推廚師發辦海膽午晚餐

Special 2021-02-24

選擇困難症係好多香港人嘅通病，尤其多發生喺出街食飯打開menu點菜時，望見長長菜式list，三心兩意，花好長時間都未揀到。如果你都有呢個食飯嘅難題，不如試試日本餐廳嘅Omakase，由廚師發辦，幫你揀最好嘅。今次小編介紹兩個Omakase俾大家，一個係平價版，一個係酒店級，迎合唔同budget嘅你。

平價版Omakase

Omakase本來係高級日本料理餐廳先有，由廚師發辦，挑選最優質及時令嘅食材。但近年廚師發辦漸漸普及，中價甚至平民化嘅日本餐廳都提供呢個選項，讓食客用一個指定價錢歎到超值又優質嘅美食。最近，「居食屋和民」推出咗一個限定極平 Omakase 晚市堂食套餐，每位$160可歎到8道菜，當中包括極上中拖羅、日本帆立貝及炸廣島蠔等。

【和民】8 道菜 Omakase 【和民】8 道菜 Omakase包括：極上中拖羅刺身、8 貫壽司盛合、牛油焗日本帆立貝、廣島縣炸蠔，以及有機蕃薯製作嘅迷你芭菲。

極上中拖羅刺身

牛油焗日本帆立貝

用和民自家農場種植嘅有機蕃薯製作嘅迷你芭菲

至於同集團另一間消費較高嘅餐廳「嚮和民」則推出每位$280歎6道菜嘅套餐，可以品嚐到日本直送鮮味油甘魚、帆立貝、海膽壽司及九州 A4 和牛等。

【饗和民尊尚二人前六道菜．廚師發辦】包括：壽司6貫、九州和牛壽喜燒、爐端燒北海道珍寶帆立貝、日本新鮮蔬菜及讚岐烏冬等。

壽司6貫壽司6貫

九州和牛壽喜燒

今次 Omakase，論價錢，超親民！雖然價錢實惠，但選料一樣認真，部分食材來自和民農場，並使用日本產食材，給你味蕾最好嘅。要留意嘅係，兩個Omakase套餐都係2人起，而且必須網上預訂，每月每店預訂50份，售完即止。和民套餐優惠期由即日至6 月 30 日；饗和民套餐優惠期由即日至3 月 31 日。

酒店級Omakase

疫情困住喺屋企咁耐，終於等到防疫措施放寬，想讓味蕾好好享受下嘅話，帝逸酒店日式餐廳源峰嘅兩位日籍主廚特別從北海道、九州等地搜羅時令海膽入饌，設計出午餐和晚餐Omakase套餐，讓掛住日本美味嘅你大飽口福。

「人気鮮味の廚師發辦海膽午餐」每位$1,180，午餐套餐包括：艾草豆腐伴美味高湯、海膽三文魚子茶碗蒸、刺身盛(赤身、春鰹、鯛)、鰆魚西京味噌燒、春山菜天婦羅、和牛海膽壽司、海膽素面、蜆煮味噌湯，以及士多啤梨奶涷。講明係用海膽為主題，多道菜都用上海膽，讓你試真來自海洋嘅鮮味。

「人気鮮味の廚師發辦海膽午餐」

「人気鮮味の廚師發辦海膽晚餐」每位$1,880，包括：艾草豆腐伴高湯、刺身盛(中拖羅、春鰹、鯛海膽卷)、竹筍床節鮑魚、鰆魚西京味噌燒、海膽紫菜天婦羅、特選海膽壽司(鹽水海膽、北海道海膽、九州海膽、昆布漬海膽)、海膽素麺、蜆煮味噌湯及士多啤梨奶涷。特別要試真嘅有海膽紫菜天婦羅，因為海膽本身軟腍水份高，油炸時麵衣和火喉必要掌握準繩，否則難做到外脆內半熟嘅口感。另外特選海膽壽司都廚師精心之作，當造海膽鮮味各異，為味覺帶來特別嘅體驗。

「人気鮮味の廚師發辦海膽晚餐」