法國童話故事《小王子》係小朋友喜愛嘅讀物，亦係唔少大人嘅童年回憶。小王子嘅故事，大家耳熟能詳，但原來《小王子》最近推出咗新版，你又知唔知道？
尖沙咀海港城最近舉行一個名為「星の流浪曲Le Havre」嘅畫展，展出由香港插畫師蔡景康(Steve)創作嘅畫作。Steven係首位華人獲法國官方授權創作2020年紀念版《小王子》繪本，佢嘅作品唔止延續小王子嘅動人故事，更加入新元素，例如在原著中小王子嘅摰愛玫瑰花將首度幻化成人形少女，與小王子相遇重逢，帶來更多思考空間。
唯獨你是不可取替
星之流浪曲
Steven話，構思時，以「眼睛是看不到的，一定要用心去看」為主題，為畫作賦予更多層意義，希望大家可細味觀賞，領略當中深意。例如原著裡小王子嘅領巾係黃色，但佢嘅新作中，領巾會隨著小王子離開B612星球而變成紅色，佢解話係想表達小王子對玫瑰嘅思念。另外，佢亦喺第二部故事裡加入新角色，例如由原著入面大象和蛇延伸出嚟唔同形態嘅小狐狸，更進一步豐富故事情節。
風是過客雲是你
海角之戀
能夠獲授權創作《小王子》嘅新版故事，Steven當然來頭唔少，喺度介紹番少少佢嘅背景先。Steven係土生土長嘅香港畫家，係首位榮獲插畫界兩大最高殊榮「英國WIA 國際插畫專業大獎」及「日本JIA插畫大賞最高賞」嘅華人。佢嘅得獎插畫作品曾經喺英國薩默塞特宮展覽及進行全國巡迴展，更曾進駐泰特現代藝術館、羅浮宮、龐畢度藝術中心等。佢更係首位與日本殿堂玩具品牌海洋堂合作推出藝術玩具嘅華人藝術家。
香港插畫師蔡景康獲法國官方授權創作2020年紀念版《小王子》繪本。
人人睇《小王子》都有唔同感悟。唔知新版嘅《小王子》又可唔可以感動到你，或者令你對人生有唔同睇法呢？
INFO
「星の流浪曲Le Havre」Steven Choi個人作品展
地點：海港城．美術館（尖沙咀海洋中心二階207號舖）
展覽日期：即日起至2021年2月21日
開放時間：上午11時至晚上8時
詳情：https://www.facebook.com/medialinkhongkong
Text: MaryLin
你或會有興趣的相關文章：
紫花紫橋紫涼亭紫巴士超夢幻│韓國紫色雙島成打卡熱點
春暖花開京都賞梅│必遊千梅神社垂梅瀑布