新年係暴飲暴食嘅日子！即使你本身唔為食，但美食當前，加上拜年期間好無聊，令人不知不覺間失控大吃大喝。食多咗油膩煎炸食品，容易有飽滯感覺，出現肚谷、胃脹、無胃口、消化不良等徵狀。想擺脫呢種難受感覺，小編幫大家搜羅咗幾個方法。

1. 飲茶

最簡單快捷嘅方法係飲茶。茶含有多酚和丹寧酸，可增胃酸分泌，促進消化。紅茶、綠茶、玄米茶、普洱茶等都有消滯功效，大家可選合個人口味嘅。唔喜歡飲茶嘅話，其實飲暖水能幫助腸道蠕動，舒緩胃部不適。想加強效果，可以一試山楂沖水，中醫角度山楂味酸，主治肉食積滯，有助消化，紓緩腹脹不適。

2. 食酸性水果

好多人都知水果幫助消化，食滯咗嘅話，不妨選食酸性水果如木瓜、菠蘿等。木瓜和菠蘿含有可分解蛋白質和澱粉質嘅酵素，有助加速腸胃蠕動，促進消化。酸甜味道亦可紓緩飽滯感。

3. 食番薯粥

傳統智慧，食滯咗要食粥，如嫌白粥味道太淡，可以試試番薯粥。番薯屬高纖食物，幫助消化，幫到你清腸胃。

4. 穴位按摩

如感到腸胃不適，輕揉按摩一下以下四個穴位，都有舒緩作用。

內關穴          位於手腕距離手掌底部約3指距離

天樞穴          肚臍正中往兩側旁開三隻手指橫放嘅距離

中脘穴          在胸骨下端和肚臍中間近胃部

三里穴          外膝對下約4隻手指距離