春暖花開京都賞梅│必遊千梅神社垂梅瀑布

新一年來臨，疫情仍未減，今年鄉民又無機會去日本賞櫻，可惜！肉體去唔到，又用眼睛去旅行頂癮。二月時份，櫻花賞期未到，但紅白梅花已開得燦爛。日本眾多賞梅熱點之中，京都在古典建築襯托下，更見梅花韻味。下年有機會在梅花開之時訪日，大家不妨到北野天滿宮親睹千棵梅花樹盛開嘅震撼，以及去城南宮觀賞粉白交織嘅垂梅瀑布。

擁有千年歷史嘅北野天滿宮，係全日本約1萬2千間天滿宮和天神社嘅總本社。西曆 947 年，當時嘅天皇為咗祭奠平安時代中期嘅代表傑出學者與政治家菅原道真，以及祈禱國家平安，興建咗呢間神社。由於管原道真非常喜歡梅花，所以在庭園種植咗過千棵梅花。呢度嘅梅花共有50種，包括：白梅、紅梅、一重梅和八重梅等，百花競放，艷麗非凡。梅花由2月上旬開始綻放，一直至3月中旬都可賞梅。

北野天滿宮

三光門與紅梅

講起菅原道真和梅花，流傳一個「飛梅傳說」。話說菅原道真被流放到九州太宰府時，有棵梅花因太想念佢，跟隨佢飛到太宰府落地生根，正因如此，天滿官神社祭堂前總會有一棵梅花。

國寶御本殿前的飛梅「紅和魂梅」

INFO

北野天滿宮

地址：京都府京都市上京區馬喰町

開放時間：上午9時至下午4時

費用：大人 1000 日圓 / 小童 500 日圓

交通：京都站乘50號或101號巴士

古色古香嘅京都，賞梅勝地又何止一個？每年到了2月，擁有1200年歷史嘅城南宮一樣可見漫天梅花。城南宮係平安時期遷都時為咗祈求國泰民安而興建，至今仍有眾多信眾來此進行方除祈福儀式。

城南宮

城南宮中嘅「神苑」，參考咗日本名著《源氏物語》中出現的「六條院」，種植咗同品種嘅花卉和紅葉，讓到訪者可以欣賞四季別具特色嘅美景。而春天係梅花開季節，城南苑內150棵粉紅色和乳白色垂梅開花時猶如一片瀑布，瑰麗壯觀。

垂梅與山茶花

垂梅

在城南宮「神苑」賞梅，不同時期到訪，各有不同體驗。在梅花初開至6分盛開嘅時候，稱為「探梅」，梅花色鮮艷麗，充滿朝氣。待梅花至全開，即是梅花最美時，「梅花瀑布」場景壯觀，呢個係「觀梅」最佳時候。梅花燦爛後，凋零在地，形成「花瓣地毯」，又係一幅美景，呢個時候去賞梅叫做「惜梅」。

賞梅期間，城南宮會有巫女在垂梅下表演神樂舞，稱之為「梅枝神樂」。

INFO

城南宮

地址：京都市伏見區中島鳥羽離宮町7番地

開放時間：上午9時至下午4時半

費用：大人 600 日圓 / 中小學生 400 日圓