時代廣場新春市集│10商戶賣特色手工年貨

因疫情關係，2021年農曆年宵市場只有濕貨賣，如果想買其他乾貨，其實今年香港各處有唔同規模和主題嘅年宵，集合一啲出售特色貨品嘅商戶，讓大家盡情購物，過一個快樂新年。銅鑼灣時代廣場今年都舉辦「POP MART」新春市集，邀請本地多個品牌，由特色食品到藝術手作都有，亦有3米高嘅figure wall俾大家打卡，路經呢區嘅你不妨去逛個圈，睇下有無心水。

雖然「POP MART」新春市集規模唔算大，只有10個檔位，轉個圈就行完，但攤檔出售嘅貨品頗有特色，唔係一般工廠量產大路貨品，滿足大家尋寶嘅欲望。

數到全場較矚目嘅檔位，應該係出售Toy Story和Disney等figure嘅Herocross。如果你係三眼仔和巴斯光年嘅鐵粉，一定要嚟睇睇，因為呢度有紀念版太空配色90cm巴斯光年和55cm三眼仔，俾你同佢哋親密地打卡。想帶佢哋返屋企都可以呀！兩款都係限量版，巴斯只有9隻，三眼仔全球發行300隻。另外，過新年想買件bing bing嘅figure加添新年氣氛，使用Swarovski嘅小飛象閃馬戲團套裝 都值得留意。

 Herocross檔位有多款Toy Story和Disney等figure及精品。

紀念版太空配色90cm巴斯光年，限量9隻。

太空配色55cm三眼仔

巴斯光年半胸像

60cm白Tee版阿薛

3米高嘅figure wall，鍾情Toy Story和Disney嘅粉絲來打卡吧！

雖然今個新年因疫情和限聚令，大家未必會去拜年，但買件新衫過新年已經係好多人嘅習慣。小編強烈推介大家要去2ndclosetdesign睇睇，店主擅長將平凡嘅NIKE衞衣紮染，變成獨一無二嘅款式。紮染嘅賣點就係每次染出嚟嘅效果都唔同，換句話說，每個款式只有一件，最啱討厭同人撞款嘅你。另外，店主又擅長將不同嘅衣物配飾拼合，變成一件獨一無二嘅衣物，既環保又發揮創意。

2ndclosetdesign店主擅長紮染，現場出售多款紮染衣飾。

NIKE衞衣拼軍褸

紮染NIKE衞衣

新年要買賀禮，唔想送人一式一樣嘅糖果、朱古力和餅乾，不如考慮NEBUHK嘅雪花酥。今個新年佢哋推出咗兩款禮盒，都適合用嚟送禮。禮盒內裡有多款口味嘅雪花酥，全部人工手造，低糖、低脂、無添加。雪花酥係乜？店主話係自家秘方嘅鳥結糖加入自家焗製嘅餅乾及杏仁混合而成。鳥結糖經過多番試味研究，既係甜食但唔太甜，重點係唔黏牙，內裡嘅餅乾很鬆脆，食落甜而不膩。呢個品牌不過面世幾個月，不時在各區開pop-up store，儲落一班忠實fans。專為牛年而設計嘅新年禮盒，簡約又有心思，內裡18件雪花酥可自選口味。另一款與社企甜蜜故事合作嘅禮盒，內裡嘅雪花酥共有9款味道，店主解釋代表人生在不同階段嘅味道，例如戀愛時期係紅豆冰味、打拼階段係咖啡味、出來社會多年後進入人生安穩階段就係苦瓜味、年老了就係陳皮味，非常有特色。 

NEBUHK為新年推出全新口味雪花酥，包括：芝士龍蝦味、開心果味、雙桃味等。

雪花酥入口軟綿，咬落鬆脆，鳥結糖香甜但不黏牙，一啖有多重口感，推出以來大受歡迎。

NEBU X 甜蜜故事 新年禮盒 $168/1盒；$298/2盒

賀禮選擇仲有另一檔由甜點大師Rocky Lai 創立嘅Bros Factory。Macaron大家食得多，雖然香甜美味，但好多人嫌太甜。於是Rocky將Macaron改良一下，變成朱古力軟心釀入曲奇，並命名為COCORON，成為一款特色甜點。COCORON外層鬆脆，中間煙韌，口感層次豐富，重點係無macaron咁甜，啱晒鍾意食甜又唔要咁甜嘅香港人。口味方面有很多選擇，有鹹亦有甜，滿足唔同要求。 

Bros Factory為新年而特別推出嘅12粒裝COCORON

新年想家居煥然一新嗎？唔一定要將家居大翻新，為家居添上花香，都足以令你對家居有全新感覺和印象。WA Candle以純天然精油和大豆蠟製作香薰蠟燭，只要在家燃點，全屋香飄飄。店主特別為今個新年推出特別氣味香薰蠟燭，混合水仙加上紫藤花嘅香氣，清新花香，清新怡人。另外，因為疫情令大家成年無去旅行，好掛住去旅行嘅感覺嗎？齋睇相未止癮，店主為多個熱門旅遊地點調配香薰蠟燭，點著即飄出當地嘅氣味，用多感官刺激，滿足一下想去旅行嘅欲望。 

WA 新春禮盒 (包括一款指定蠟燭、杯墊及火柴) 

除以上特色手工年貨外，現場仲可以買到老夫子限量賀年特別版口罩、日本製手工木製濾杯、台灣製手工竹製杯、羊毛氈嘅飾物，以及德國手工啤和蜂蜜熊仔糖等。想買年花？呢度都有，日本蘭恩桃盆景、日本蘭雪映蝶盆景等，造形優美，擺喺屋企加添新年氣氛。

老夫子限量賀年特別版口罩.

台灣製手工竹製杯

羊毛氈嘅飾物

德國蜂蜜手工啤

特色年花

INFO

「POP MART」新春市集

日期：2月8至28日

地點：銅鑼灣時代廣場5樓517-519號鋪