大掃除不靠化學用天然│檸檬白醋梳打粉強效除萬年漬| likemagazine.com.hk
Focus
大掃除不靠化學用天然│檸檬白醋梳打粉強效除萬年漬

大掃除不靠化學用天然│檸檬白醋梳打粉強效除萬年漬

一年裡頭,日日都可以幫家居大掃除,但人係懶嘅,平時無誘因動力盡理唔做。到咗年尾,既然有「年廿八洗邋遢」呢個習俗,大家都樂於喺呢段期間將家中嘅塵垢和污漬等清一清。大掃除最煩人係用盡唔同清潔產品都清唔到陳年嘅污漬,其實與其信化學,有無諗過back to basic用天然方法更好呢?原來只要有梳打粉、檸檬和醋,就可以將家居污漬除得一乾二淨。

 

檸檬

檸檬有陣陣清新香氣,最強係辟臭。家中臭味重災區之一係微波爐,尤其家人喜好重口味嘅,經常烹煮濃味食物,平時打開微波爐嘅門都聞到強烈異味。要除味,只要將檸檬切片放入一碗水,然後放入微波爐叮數分鐘,記住咪即刻開門,等佢焗一陣先。咁做唔止可以令臭味無晒,爐內嘅油漬污垢都變得易清理,用濕布一抹就乾淨晒。

 

辟味之外,檸檬嘅酸性去漬都好強。愛入廚嘅你,係咪發覺經過一年努力,砧板好多漬呢?有漬唔止係污糟嘅表徵,更可能暗藏細菌,有菌除時影響健康。呢個時候,檸檬又派用場!切一小片檸檬擦拭下玷板表面,就可以除漬除臭。

 

另一個常用又未必經常清理嘅地方,就係電熱水壼。熱水日煲夜煲,日積月累壼內會積累水垢。要清乾淨,只要煲水時加幾片檸檬,就可以除垢潔淨,壼內更有清新檸檬香。

 

白醋及梳打粉

白醋有去漬殺菌功效,用嚟清潔瓷磚,潔淨效果不錯。抹地時,濕布加白醋,地板就會立立令。用同樣方法抹廚房和洗手間嘅瓷磚牆身、地板都可以。

 

家有地氈,唔想洗晾咁麻煩,有梳打粉就可以有「乾洗」之效。方法係喺地氈面撒上梳打粉,靜置約15分鐘,之後用吸塵機吸淨,咁就可以將地氈嘅難搞污垢一次清走。

 

洗衣機幫大家洗乾淨啲衫,但你知道洗衣機用得耐,其實啲邊位易積藏皂垢和污漬嗎?唔知道嘅話,試下揭開啲膠邊望下就知幾污糟。清潔洗衣機方法好簡單,先在洗衣機內放熱水,然後倒入約100克梳打粉,然後開動洗衣機,等佢攪動幾分鐘,再浸泡約1小時。最後,放水,再當進行一次平時洗衣程序,洗衣機就乾淨晒!

 

數全屋最難搞嘅漬,抽油煙機嘅油漬無得輸。油漬強頑又黐𥹉𥹉,令人勁討厭,掂都唔想掂。要清走呢啲萬年油垢,梳打粉係最有力嘅幫手。先將滿布油垢嘅部件拆下來,開一盆暖水,加入梳打粉,將部件浸約15分鐘。記住唔可以心急,一定要浸到透,油垢先會融化。之後取廚房紙,擦抺一下,油垢便輕鬆洗走,然後再過清水便可。抽油煙機嘅扇頁唔能夠拆下來嘅話,取廚紙浸透混入梳打粉嘅暖水,然後舖在有油垢嘅扇頁上,待一會,便可嘗試擦走油垢。

 

另外,白醋和梳打合起嚟一齊用,清潔效果更強,呢招最啱出嚟通渠口,如廚房鋅盤和洗手間嘅洗面盆、淋浴間嘅去水位。呢啲渠口經過長年使用,容易有污漬及有淤塞情況。在去水位倒入適量梳打粉、白醋及熱水,便可輕鬆去漬除臭,渠口暢通,去水更快。

 

用嚟儲存食物嘅雪櫃,唔好唔記得清潔呀!溫水加梳打粉,然後用嚟抹雪櫃,可去除食物殘漬污漬。如覺得雪櫃內積存食物嘅異味,只要將白醋倒入碗中放進雪櫃,便可充當除臭劑。

 

Text: MaryLin

 

你或會有興趣的相關文章:

尖沙咀親民價歎星級意廚出品│爆肉pizza媽媽味肉醬意粉

打破一般越南菜框架│南越fusion菜驚喜食味體驗

 

 

相關文章
香港國際電影節首推網上觀影證│ 4K數碼修復王家衛4大名作香港國際電影節首推網上觀影證│ 4K數碼修復王家衛4大名作 白熊和蜥蝪化身熱辣蒸包│唐記包點X角落小夥伴推限定食品白熊和蜥蝪化身熱辣蒸包│唐記包點X角落小夥伴推限定食品 【母親節送禮】OGAWA母親節購物優惠│買按摩椅獲贈高達$5,200禮品【母親節送禮】OGAWA母親節購物優惠│買按摩椅獲贈高達$5,200禮品 基督教勵行會慈善步行│完成1萬步籌款支援基層兒童基督教勵行會慈善步行│完成1萬步籌款支援基層兒童