當造車厘子塔斯曼尼亞貨最熱賣│皮脆肉甜爆汁車厘子要咁揀

正所謂不時不食，今期當造又美味嘅水果，士多啤梨之外，小編舉手舉腳選車厘子！車厘子全年都有，夏季產嘅主要來自美國和加拿大，冬季嘅產地主要係智利、澳洲和新西蘭。由於澳洲產嘅車厘子比其他產地嘅較大粒，外皮咬落脆卜卜，肉質甜美多汁，所以近年大受香港人歡迎，更成為搶購目標。

澳洲產嘅車厘子中，以塔斯曼尼亞出品質量最佳，大粒又爆汁。塔斯曼利亞車厘子有3大熱賣品牌，包括：43° South、Reid Fruits 金袋鼠及T.R Tasman Ruby 紅寶石，禮盒包裝，普遍每盒2 kg重。以最為港人熟悉嘅43° South為例，售價一般6百多起跳，再優質啲兼大粒啲嘅，可能要索價近千元。不過，以往要買塔斯曼尼亞呢啲貴價車厘子，要去專賣貴價水果嘅店舖或果欄先買到，今年小編發現唔少走高級路線嘅超市都有入貨，而且售價比水果店賣得更平，唔使5百元就買到一盒，勁抵！

買盒裝車厘子時，除考慮牌子外，睇下盒邊嘅label，會搵到更多資訊，等你知道係咪抵買。

1. 品種 variety

車厘子品種有數十種，若論味道口感，較受歡迎和獲得好評嘅有：Kordia、Regina、Lapin、sweetheart，以及Rainier。

2. 大小 Size

以依家市面有售嘅盒裝貴價車厘子嚟講，普遍有30-32mm大，大起嚟36mm都有(比一個$5硬幣仲要大)。除咗直接用數目字表達，亦有公司以英文字作代號，例如：G、P、S、X、J及L。要解讀呢埋英文代號，其實都唔難：

G=GIANT

P=PREMIUM

S=SUPER

X=EXTRA

J=JUMBO

L=LARGE

3. 顏色Colour

一般而言，車厘子顏色可分為3大類：L係淺色；R係紅色；D係深色。部分公司會將車厘子顏色和大小嘅代號併埋一齊，例如XXJL。

另外，如果買大品牌盒裝貨，要留意喇，最近市面出現唔少假貨。要保障自己真金買到真貨，教大家幾個識別方法：

1. 包裝上有生產商商標

2. 有獨立產品編號

3. 紙盒印刷清晰

4. 如附有QR code，嘟一嘟check 認證

用得幾百蚊買車厘子，當然想買到大粒、超甜和爆汁嘅。咁點揀至好呢？主要睇3個重點：

1. 皮光肉滑

買生果嘅黃金法則係表皮滑溜溜，有光澤，無損無爛。想買車厘子，更要嚴守呢條法則，有爛、皮皺、爆口都唔係靚貨。另外，如果車厘子肉變腍，有可能壞咗，唔好買呀！

2. 梗青綠蒂凹

車厘子有條梗連住，而梗係青綠色，代表新鮮。果梗位置嘅蒂，愈凹愈甜。

3. 深色較甜

車厘子深色代表果肉已熟，一般較甜，但太深太黑都未必好，車厘子可能熟到近乎爛。較淺色嘅一般肉實啲，咬落爽脆啲。