DONKI藍灣廣場開第七分店│增設情熱食堂賣即煮牛丼豬排丼

Don Don Donki第七間分店開幕喇！今次落戶小西灣藍灣廣場，而且再次就近民居，住喺附近嘅「鄉民」突然思鄉病發作，都可以去掃貨！逾2萬呎新店，除咗有大量日本零食、生活品、美妝品、玩具及新鮮食材等之外，特點係全港第一間分店設有「情熱食堂」，出售即煮日式炸豬排丼、牛丼。雖然呢間店營業時間只係去到凌晨1點，但咁夜仲可以買到日本美食和用品，足以為久未出遊嘅鄉民一解鄉愁。

Don Don Donki嘅分店驟眼睇落去好似間間差唔多，但喺布置設計上，每間店都有自己嘅主題。呢間主題係「四季」，店方話想讓大家體驗日本四季分明嘅生活方式和文化。

雖然布置有心思，但相信大家入到去只會關心有乜筍貨或新貨買多啲。講番呢間店嘅特色，就係門口設「情熱食堂」，出售即煮日式炸豬排丼、A4西冷和牛丼，以及多款日式食品，而甜品部更有軟雪糕和可麗餅賣。另外，大家仲可以隨心配搭傳統預製產品及即製餐點，由關東煮，燒雞串到日式甜點都可隨意點配。住喺附近嘅居民以後又多個開餐搵食嘅地方。

打算去DONKI買嘢食開餐嘅話，其實店內都有好多熟食、壽司和甜品選擇。呢間DONKI嘅壽司部，除咗有各式壽司拼盤賣之外，更設自選壽司服務，每日有十多款壽司自選配搭。

好多人對DONKI嘅印象就係平買日本嘢，呢間分店將「平買」概念再放大，設有「10元專區」，大量精選日本生活品、清潔用品、餐具等，售價最平$10，部分更低見$5。就快過年，屋企好多嘢要舊換新，嚟呢度可以掃得爽又開心。

分店新張開幕，唔少得優惠益街坊。2月4至8日，每日首200名顧客消費滿$600或以上，即可獲贈香港版DONKI帆布袋一個。

INFO

DON DON DONKI藍灣廣場店

地址：小西灣藍灣廣場1樓102及108號舖

營業時間：早上9時至凌晨1時