紫花紫橋紫涼亭紫巴士超夢幻│韓國紫色雙島成打卡熱點

紫色給人夢幻感覺，神秘又不真實。在韓國就有兩個小島因島上經常盛開紫色嘅花，加上樓房、設施、餐廳、指示牌等都漆上紫色，因而被冠上「紫色島」嘅稱號，亦因為呢度嘅浪漫神秘感覺，成為韓國最新打卡熱點。

位於韓國全羅南道新安郡嘅朴只島和半月島，島上種植咗風鈴花、薰衣草和桔梗花等，每到花期，島上一遍紫色花海，所以又有「紫色島」嘅美名。呢兩個島風景咁特別，其實識路嘅韓國人早已經視為放假休閒勝地，不過花海在韓國多個地方都有，而且各有特色，就算紫色花海好迷人，呢度仍然保持神秘感，唔係好多人湧去。但係，去年起，呢兩個島突然爆紅，更獲韓國行政安全部提選為該年度「放假時最想到訪的島嶼」，點解嘅？原來同地方政府將小島活化有關。

話說去年當地政府為吸引更多遊客去玩，決定重新活化小島，將連接朴只島和半月島嘅橋樑進行翻新，並油上紫色，搶眼突出。地標從此變得更搶眼，亦因為紫色橋夠特別，打卡呃like更容易，令呢兩個紫色島火熱起嚟，成為好多人心目中必要一遊嘅地方。除咗橋之外，當地大部分公共設施、步道、建築物都油成紫色，令兩個島成為名符其實嘅「紫色島」。遊人到訪紫色島，只要身穿紫色衣物、手提包或雨傘，都可免費入場。

連接朴只島和半月島嘅橋樑進行翻新後油上紫色，紫色橋夠特別，瞬即成為韓國打卡熱點。

  藍色的天和紫色的橋，令人有如置身童話世界！

出入口放著代表兩島形狀的模型，葫蘆代表朴只島，而坐在半月上的小王子模型則代表半月島。

島上提供收費「紫色鄉村巴士」給遊人乘搭，甚至可租借單車來環島觀光。

既被美名為紫色島，連海邊嘅步道都係紫色！

半月島上處處可見紫色建築物，地標之一嘅「天使亭」屋頂亦係紫色。紫色嘅涼亭好少有，難怪個個嚟到要打卡。

朴只村上有3條登山山徑，只要1.5至2小時便可走畢全程。島上嘅紫色指示牌話你知點行。

6月時份來到，可以欣賞到紫紫藍藍嘅繡球花。

島上不少公共設施都油上紫色。

現居於兩個島上嘅人以老人為主，「半月島咖啡店」就係一間居民經營嘅咖啡店，店員由婆婆充任，佢哋會為客人沖製飲品。

呢間咖啡店咁出名，其中一個原因係旁邊有個紫色電話亭，好多人專程去打卡。

INFO

地址﹕全羅南道新安郡安佐面半月里  전라남도신안군 안좌면 반월리

電話﹕061-240-8687

費用﹕成人3,000 韓元；青少年2,000韓元；兒童1,000韓元；65歲以上免費  (*如身穿紫色衣物﹑手提包或雨傘亦可免費入場)

交通﹕在木浦巴士客運站(목포버스터미널)乘坐2004號巴士到安佐面邑洞十字路口(안좌면읍동사거리)下車，轉乘安佐鄉村巴士(안좌마을버스)在紫色橋站(퍼플교)下車，車程約2小時；或在宋孔渡輪碼頭由經天使大橋駕駛到紫色橋，車程約40分鐘，乘的士車費約56,000韓元

網址﹕http://www.xn--hq1bs1nia601i5qd.com/

Text: MaryLin

Photo: 韓國觀光公社