尖沙咀親民價歎星級意廚出品│爆肉pizza媽媽味肉醬意粉

飲食 2021-02-03

疫情擊港逾年，在嚴緊嘅社交距離措施下，外出用膳變奢侈。所以當小編決定放棄食飯盒，要外出午膳時，會非常珍惜呢次機會，希望善待肚皮，拒絕劣食。尖沙咀最近新開一間意大利餐廳，由意大利米芝蓮星級大廚出任行政總廚，主打多款手工薄餅及鮮製意大利麵，平民級價錢，星級質素，意大利家庭味道。開業以來大受歡迎，午膳時間經常爆場，亦吸引同區上班族專程嚟買外賣。

落戶在海港城嘅Da Filippo意大利餐廳。

雖然現時有限聚令，但午膳時間仍然旺場。

意大利餐廳香港有好多，間間都話自己正宗，但講就係真咩？其實唔少為迎合港人口味，都係改良港版，失去傳統意大利味道。但呢間最近落戶海港城嘅Da Filippo，由來自意大利佛羅倫斯、連續20年榮獲米芝蓮名銜星廚嘅Andrea Alimenti出任行政總廚，出品當然正宗地道，更有意大利客人食完大讚有家鄉風味。Chef Andrea雖然貴為星級廚師，但佢唔鍾意扮高深，堅持以最樸實嘅烹調技巧，加上精心挑選嘅地道優質意大利食材，煮出充滿意大利家庭feel嘅菜式。

來自意大利佛羅倫斯、連續20年榮獲米芝蓮名銜星廚嘅Andrea Alimenti出任行政總廚。

Chef Andrea

要知道一間意大利餐廳嘅出品有幾正宗，叫個pizza試下就見真章。Pizza係意大利飲食文化中重要嘅一塊，你見美國人將菠蘿加落pizza，意大利人寧餓死都唔會食，就知意大利人對pizza有幾執著和堅持。Chef Andrea製作嘅pizza，係用店內自家培植酸麵種造餅底。佢嘅酸種係用意大利入口嘅Petra 3石磨粉、水、蘋果皮、蜜糖和砂糖來起種。用酸種造嘅餅底，帶有一種天然嘅酸香，而且更脆口，並且能突出pizza配料如肉類嘅味道。

呢度提供嘅意大利pizza款式共有8款，數到招牌必食有「情人眼裡出肉肉Pizza」。單睇個名，都知呢個pizza為食肉獸而設，而事實，呢個pizza嘅肉量確係多，而且有5款咁多，包括：Salami、Parma Ham、Finocchinona、Pancetta和Spicy Salami，滿足肉食性強嘅人。以呢個價錢，小編覺得堅抵食，比起本港另外一間大眾化嘅Pizza店，呢個無論食味和份量都完勝。

情人眼裡出肉肉Pizza $188

若果你係芝士狂嘅話，就一定要試「芝士四重奏」。一啖咬落去，芝士味濃到化不開；用上4款芝士，包括：Gorgonzola、Mozzarella、Smoked Scamorza和Parmesan，芝士有濃味有淡味，有硬身有軟身，混合埋一齊，就係完美「芝」味。好多人order pizza時，會睇有乜餡料，去衡量係咪抵食，見有肉有海鮮先覺值回票價。不過呢，要試到傳統意大利pizza風味嘅話，小編強烈建議你點呢個或者「皇后瑪格」，通過芝士、番茄醬和酸種餅皮嘅結合得來嘅食味，去真正欣賞意大利pizza獨有嘅滋味。

芝士四重奏Pizza $148 芝士四重奏Pizza $148

Pizza以外，Chef Andrea更拿手係意大利粉。意大利粉每日新鮮自家製，唔用現成貨。新鮮手工造意大利粉和工廠量產嘅意大利粉在食味上有很大嘅差別。手工造嘅小麥香較重，而且麵條有質感，較易品嚐到意大利人引以自豪嘅Al Dente咬感。另外，麵條吸收醬汁力更好，食起嚟更滋味濃郁。Chef Andrea造意大利粉認真又講究，用料方面特別挑選咗Petra 220麵粉。呢種麵粉係由意大利中心北部一間逾160年歷史、家庭式經營吒麵粉廠專為意大利麵而出產，屬00級數，幼滑又雪白，而且吸水性高，小麥香濃。Chef Andrea用呢種麵粉及新鮮雞蛋，以純熟嘅手藝造出各式意大利粉。

經典卡邦尼意粉係Chef Andrea嘅拿手菜式，亦係呢間餐廳嘅人氣單點。呢度經典意大利菜睇落簡單，但要做得好唔容易。坊間有餐廳加忌廉和牛油，造出濃郁滑溜口感，但Chef Andrea話傳統意大利菜唔會咁做。佢就用新鮮蛋黃、parmigiano芝士及pecorino芝士調汁，汁醬味道更有層次而且唔會「漿口」。意粉所用嘅「肉粒」，都係Chef Andrea精心之作。佢先用白酒醃意大利面頰肉，然後煎至香脆。肉粒味道鹹香，咬落香脆，為意粉提味。

經典卡邦尼意粉 $58 經典卡邦尼意粉 $58

數到經典意大利粉，又點可以少咗肉醬意粉呢？呢度嘅「經典肉醬扁意粉」所用吒肉醬汁，又係Chef Andrea自己造架！食材優劣對食味有一定影響，Chef Andrea嚴選來自意大利Campania嘅去皮番茄，加入蔬菜、牛肉及紅酒，煮最少4小時，製成肉醬。點解佢特別要用Campania出產嘅番茄呢？原來呢個地方處於Vesuvio火山區，土壤非常肥沃，含豐富礦物質，種出嚟嘅番茄份外鮮甜。肉醬意粉係一道好經典嘅意大利家庭菜式，想試下咩係意大利媽媽嘅味道，呢道意粉俾到你。

經典肉醬扁意粉 $168 經典肉醬扁意粉 $168

番茄和牛肉嘅配搭，在意大利菜中很常見。另一道可以試到呢兩樣食材融合一起嘅美味，就係經典肉丸配番茄醬。或者有人會覺得呢道菜不過係肉醬意粉走意粉，但所用食材相似，但製作完全不一樣，食味都有唔同。Chef Andrea採用家鄉做法，選用偏少肥肉嘅牛肉，混入牛奶、麵包、番茜和新鮮百里香打成肉丸，然後把肉丸放入用意大利Campania去皮番茄、蒜、橄欖油和羅勒煮嘅番茄醬裡。牛肉宲和番茄完美混合一起，仲有淡淡香草香氣。肉丸啖啖肉，又係食肉獸不能錯過嘅一道菜。

經典肉醬扁意粉 $168 經典肉丸配番茄醬 $98