疫情未減買年花唔想同人迫│綠田園撐本地花農WhatsApp訂年花

年又過年，好快又過新年。呢幾日本港鮮花集散市場─旺角花墟人頭湧湧，水洩不通。有人擔心咁樣迫住買家，隨時染疫。年花總要買，但唔想同人迫，又想藉呢個機會藉下本地花農，非牟利慈善團體綠田園最近與華園農場合作，用WhatsApp就可以買到新鮮劍蘭和百合，訂貨後可在指定地點自取或要求送貨服務。

去年，本港經濟受疫情影響，各行各業元氣大傷，部分商戶生意驟減，瀕臨在結業嘅邊緣。新年係消費需要及意慾最強嘅檔期，既然好多嘢都必要買，不如支持本地商戶，用行動來撐本地經濟。例如新年將至，好多人習慣買花過年，既為家居添氣氛，亦希望討個好意頭，新一年花開富貴。綠田園最近與位於文錦渡邊境本地嘅華園農場合作，推售本地種植嘅劍蘭和百合。

劍蘭和百合嘅品種都係嚟自荷蘭，農夫以大花頭種植百合，更以特大花頭種植劍蘭，而劍蘭係會連花頭都畀埋你。有買開花嘅都知，百合品種繁多。今次推銷嘅百合有4款，包括：火鳳凰百合、黃天霸百合、大連百合及金百合，都係常見而且顏色漂亮嘅品種。至於劍蘭，係紅獅劍蘭，一株上有連中嘅紅色花，寓意鴻運當頭。

由於本地農地規模有限，本地花農種年花，面對唔同挑戰，在價格上未必最有競爭力，但論質素，本地農夫都係有心人。好似華園農場負責人謝振華，一人打理整個農場，由於專注務農，對推銷宣傳一竅不通，亦不曾開放農場讓公眾入內買年花。綠田園今次合作，既能幫助本地農夫，同時讓香港人撐本地花農，又買到本地種嘅靚年花過年。

價錢方面，劍蘭6枝賣$228，百合2枝$168，最低訂購量係6枝劍蘭或2枝同款百合，不設散賣。有興趣買本地年花撐本地農夫嘅你，可於2月4日起用WhatsApp訂購，可選擇到綠田園基金荃灣金色有機園圃自取，或另付$150要求年花直送到指定地址。由於人手有限，送貨只限在2月8日上午10時至下午4時內，不能指定日期及時間。本地靚年花產量有限，賣晒就無。

INFO

https://www.facebook.com/producegreen

Text: MaryLin