打破一般越南菜框架│南越fusion菜驚喜食味體驗

香茅豬扒、扎肉撈檬、米紙卷、牛油雞翼、生牛肉湯河......如果你覺得越南菜只係呢啲，你對越南菜嘅認識真係太少！最近旺角開咗一間主打南越菜式嘅餐廳，主理人小時候常吃嫲嫲煮嘅越南牛肉粉，加上佢曾經在美國讀書生活，以及跟隨日籍米芝蓮星級廚師學廚藝，在多國文化衝擊下，得到烹調靈感，決心要將真正「南越風味」帶給香港人，並創作多款fusion菜式，給食客驚喜食味體驗。

旺角係香港嘅核心，人多車多餐廳都有好多，要搵食唔愁冇選擇，只係多數餐廳質素平平。今日小編推介呢間NAM VIET NAM Cafe南越南咖啡廳，係少有食得出用心嘅餐廳，除咗照顧你打卡需要，亦滿足味蕾慾望。無論食材配搭、烹調方法及擺碟造型，顯見花心思，打破一般越南餐廳嘅老土印象。

  餐廳環境就像咖啡廳，有別一般越南菜館。

餐廳嘅主理人Justin在餐飲界具有豐富經驗，曾在美國開越南餐廳，在香港又經營多間日本餐廳、老撾菜餐廳等。今次開設越南fusion餐廳，就係想讓香港人試到佢家鄉嘅風味。Justin嫲嫲係老撾人，爸爸係越南華僑，自小食慣嫲嫲煮嘅越南菜，對地道越南口味很熟悉。呢間餐廳主打南越南風味，菜式食味比港人常吃到嘅北越菜較濃和惹味，加上Justin注入多國烹調元素，令每道菜不但色香味俱全，而且給人煥然一新嘅越菜新體驗。

餐廳裝潢時尚休閒。

食越南菜不得不點牛肉粉，餐廳有無誠意做菜，有幾多功架，係咪正宗，一食牛肉粉就知真章。Justin有「越南粉教父」之稱，曾創下日賣400碗越南粉嘅長龍紀錄。嫲嫲南越湯 - 招牌金邊粉係佢嘅成長味道回憶。佢將從小食慣嘅味道，用多年鑽研改良，炮製成一碗用上牛隻5個部位、用24小時熬煮湯底嘅越南粉。湯底濃郁嘅牛味，愛牛者一試醒神；雖然重肉味，但入口卻超乎想像清甜，不覺油膩。牛湯以外，仲有多種口感嘅牛配料，包括肉片、牛面頰、牛腱、牛筋及牛丸，食味豐富精采。

 嫲嫲南越湯 - 招牌金邊粉 $88

好多人喜歡越南菜，因為覺得越南美食較輕盈，特別係小食和前菜，即使多試幾款都唔會有飽滯感。越南盛產稻米，當地唔少美食都用米造，例如米紙和米粉等。呢度有多款美食都用上米紙和米粉，首先紹一下係NVN高樓炸米塔，米粉炸脆後疊高，食之前將以香茅、青檸葉等製成嘅湯汁淋喺米粉上就得。米粉入口又脆又軟，口感層次豐富，帶來越南米粉新食法。

NVN高樓炸米塔 $48

如果你偏好脆口食物，不能錯過脆米紙薄餅。一般越南餐廳多數用米紙做卷物，但呢度就將米紙炸脆當薄餅皮用，上面加越南香腸、秘製酸瓜和檳榔葉等。米紙咬落鬆化，越南香腸甜甜地，酸瓜微鹹帶酸，食味交雜非常有驚喜。

脆米紙薄餅 $48

至於小編個人心水必食推介，就係五香豬腩伴鍋巴。米通炸得香脆，咬落卜卜聲，而且入口非常清爽，零油感。上面嘅豬腩更精采，肉香味濃，肥膏位睇落肥膩，但食落爽脆，不油不膩。伴以特別調配嘅微酸醬汁，開胃醒神。鍋巴一口size，擘大少少個口一啖食，米香肉香共治一爐。

五香豬腩伴鍋巴 $48

數到越南名食，大家最熟悉嘅一定係法包。NVN南越法式麵包配肉湯嘅餡料唔係常見嘅雞絲、扎肉，而係豬耳、燻蹄加扎肉，口感方面更有嚼頭。另外，法包搽上自家製黑啤酒豬肝醬；附上招裨肉湯，大家可以法國「French Dip Sandwich」方式，沾湯食包，創意新食法，美味升級。

NVN南越法式麵包配肉湯 $78

Justin係一個鍾意試新嘢嘅人，所以佢為一道平凡嘅炸雞軟骨加點新意思，就係shake！大家享用雞軟骨之前，先將雞軟骨放入紙袋，然後加入秘製蒜香調味、辣椒、青檸葉和香茅等，跟住出力shake shake，令味粉均勻附喺雞軟骨上面，食起嚟會更惹味。

Shake Shake雞軟骨 $42

另一道加入創意嘅美食係南越蟹肉醬配脆球餅 。炸到金黃香脆嘅球餅，輕易取悅喜歡香口食物嘅人歡心。蟹肉醬鮮味十足，作為前菜小食，預計一上枱就瞬間被掃清。

南越蟹肉醬配脆球餅 $68

越南菜特色之一係使用大用香料和香葉。香葉有助提升肉味，同時增添味道層次。烤蔞葉豬肉卷係一個佳作。豬肉醃後用帶有胡椒辛香嘅蔞葉包著烤熟。蔞葉嘅香氣逼入豬肉裡，惹味可口。

烤蔞葉豬肉卷 $38

主菜方面，小編推薦烤蔞葉雞配青蘋果條，一定要試。呢道菜以越南名菜Bo La Lot，即蔞葉烤肉卷為靈感，主角換上雞隻，蔞葉嘅辛香引出嘅鮮甜肉香。伴配嘅青蘋果條經精心考量，由於有感一般沙律採用木瓜絲或青瓜絲太普通沒特色，而且多數港人都唔鍾意食，所以特別改以蘋果條做沙律，味道酸酸甜甜易入口，而且加入蝦油撈均，增添一層鮮味。

烤蔞葉雞配青蘋果條 $78 / 半隻；$98 / 原隻

聚會人夠多嘅話，可點選烤慢煮12小時乳豬配生菜包。炮製方法一啲都唔簡單，採用滲透壓嘅煮法，讓肉質保持鬆化多汁，再以低溫慢煮12小時後放至焗爐烤製，外皮超脆。

烤慢煮12小時乳豬配生菜包 $180

除咗創意十足嘅菜式，餐廳亦有多款特色飲品。近年越南潮興蛋啤酒，呢度都可以試得到。自家嘅蜂糖蛋醬搽滿杯身，然後斟入啤酒，試過你會發覺，雞蛋和啤酒味道竟然咁夾！

越南蛋啤酒 $38

越南滴濾咖啡好多人都飲過，被譽為「國民飲品」嘅越式蛋咖啡，你又試過未？咖啡沖好後，加入一層焦糖蛋醬，之後會用火槍輕烤一下至面層焦香，蛋醬入口時感覺極像焦糖布丁，與咖啡嘅微甘苦味形成對比，雙重口感，美味無窮。

越式蛋咖啡 $28

INFO

NAM VIET NAM Cafe南越南咖啡廳

地址：旺角彌敦道726號1樓

電話：2311 9333

Text & Photo: JosiYan