日本人氣100円家品店進駐沙田│清潔品廚具收納箱全部$12

購物 2021-01-19

仲有唔夠一個月就到農曆新年，大家係咪開始留意執拾整理屋企，發覺好多生活品用舊咗要換，又發覺要添置廚具方便入廚，亦發覺要買啲清潔用品來清潔家居？唔想左撲右撲先買齊以上用品，一田百貨沙田店最近開咗間「Watts」，提供近3千款生活雜貨，全部$12，讓你一站買齊需要生活品，而且貨品性價比高，大家不妨去逛逛，尋寶同時為家居生活加fun！

日本人氣100円家品店Watts進駐一田百貨沙田店。

「Watts」係日本人氣100円家品店，全日本有逾1,300間分店。路線和出售嘅貨品，與大家熟悉同樣以平靚正見稱嘅Living Plaza相似。如果大家逛後者已經覺得了無新意，呢間舖可以俾到少少新鮮感。貨品種類一應具全，廚房用品、浴室用品、清潔收納產品、個人護理、文具及電子產品、飾品雜貨、DIY工具、嬰幼兒產品、園藝工具等，應有盡有。

年近歲晚，堆積喺屋企成年嘅塵垢和垃圾，係時候清一清。店內有各式洗邋遢工具如窗刮、各式抹布及刷子、除塵轆、水桶、垃圾桶、棉被除塵拍打棒、磁磚/廁房爐頭/牆身去漬工具及等，助你嘅清潔工作做得流暢和有效率。部分工具更有可愛造型，為你嘅清潔工作加添趣味。

部分日系清潔工具有可愛造型，為你嘅清潔工作加添趣味。