疫情關係政府取消實體年宵│逛網上年宵市集睇live辦年貨| likemagazine.com.hk
Cover
疫情關係政府取消實體年宵│逛網上年宵市集睇live辦年貨

疫情關係政府取消實體年宵│逛網上年宵市集睇live辦年貨

新冠肺炎疫情肆虐,香港過去一年嘅零售市道走入冰河時期,商戶原冀望農曆新年將至,藉著過節氣氛,市民大眾購物意慾高,可以為銷售稍為解凍。可惜,政府因應疫情,繼續實行嚴格嘅社交距離措施,包括二人限聚令和晚上6點禁堂食,而且宣布取消農曆年宵市場。行年宵係大眾慶祝節日嘅主要活動,亦係搜購過節用品及食品嘅好地方,取消年宵,不但令商戶檔販失望,亦令大眾失去便捷辦年貨嘅地方。擁有豐富電子商貿經驗嘅Tequila有感自疫情後,港人對網購愈來愈接受,而且網購也成為港人生活新常態,於是萌生舉辦網上年宵嘅想法,既為商戶檔販提供虛擬銷售平台,也為消費者帶來一站購物嘅便利。第一階段招收檔主,Tequila已收到十多個申請,反應熱烈。她期望今次活動發揮資源共享力量,為商戶檔販在逆境中尋找新商機。

 

365日轉眼過去,但疫情唔肯退。相信好多人和小編一樣,以為做足防疫措施,堅守戴口罩和勤洗手,放棄復活、中秋和聖誕家人朋友歡聚時光,可以等到農曆新年開心團年嘅機會。點知一年過去,香港疫情依然嚴峻,二人限聚令、禁堂食仲未夠,連農曆年宵市場都取消埋,有消息更指政府在研究要求商場提早關門。農曆新年係全年重頭節日之一,疫情已經令港人不能出遊shopping,購物慾積累,年宵市場取消,無疑令市民大眾再一次失去暢快節日購物嘅樂趣和機會。

 

現為一間時裝品牌電子商貿總監嘅Tequila,對網上銷售運作非常熟悉,佢發覺自有疫情後,網購成為市民大眾生活新常態,連本來抗拒接受電子潮流嘅年長一輩由陌生至無奈使用,到近來慢慢習慣,她相信網購將有更大發展空間。「我有留意HKTVMall嘅年報,佢哋原本預期2020年底才收支平衡,但結果今年年中已有利潤,可見香港人已接受網購呢種消費模式。」

 

行年宵辦年貨係市民大眾迎接農曆新年嘅傳統節目,然而今年年宵市場卻因為疫情而要停辦,令好多人失望。「我自己都好鍾意行年宵,購物之外,感受熱鬧氣氛。」Tequila指出,年宵市場亦係唔少商戶嘅全年裡黃金銷售檔期,取消年宵令佢哋失去重要接觸潛在顧客嘅機會。「既然大家都習慣網購,所以將年宵在網上舉行應該行得通。」

 

網購近年喺香港先算普及,但Tequila早喺二千年初積極投入網購世界。佢喺2004年已在eBay開店賣手機配件,及後亦有在淘寶、天貓等開店做代購,甚至為現職嘅時裝品牌成功開拓電子商貿並錄得過千萬銷售額。佢今次自發籌辦網上年宵,純粹出心,希望運用自己累積嘅十多年豐富而且亮麗嘅網上銷售經驗,幫助一班面對零售逆境嘅小商戶。「我嘅理念係資源共享。其實每個商戶都有自己嘅網絡,我希望透過今次虛擬年宵市場,商戶互相帶來人流,不論多少,一齊製造商機。」

 

Tequila籌辦中嘅「2021網上年宵市集」有3個特點,就是不用競投、不用租金及不用提成。「因為目前所有市集所有工作如籌備、聯絡、建立網站、開設社交平台、對外宣傳等,都係我一人獨擔,無成本,所以商戶可以全免費參加。」Tequila表示,呢一刻無諗過賺錢,只想做到類似小商會嘅角色,發揮作用。「當然我付出努力都有得著,就係認識到更多不同界別、行業嘅人,建立網絡。假設今次市集成功,我會考慮繼續經營,到時或要請人幫手,有成本就會收費。而今次經驗得到嘅網絡,就有助之後發展。」

 

疫情發生以來,香港都有多個大型銷售活動轉到網上舉行,例如工展會及漁濃美食嘉年華2021等。Tequila表示,在籌辦網上年宵市集期間,有留意及參考呢啲活動,發覺多數運作形式有如一般銷售平台,將貨品資訊放在網上供消費者自行瀏覽,形式較被動,只靠文字和相片吸引消費者。「我呢個市集嘅特色係有個『直播市集專區』,屆時檔主會做video live推銷貨品。大家登上平台後,可自行選擇收睇有興趣嘅live,情況好似大家去到年宵,見到心水攤檔行入去睇一樣。雖然係虛擬市集,都想大家感受到好多攤檔好多嘢賣嘅熱鬧氣氛。」Tequila仲話,做live係大趨勢,而且由真人講解推銷,可更清晰展示產品嘅特點,並為消費者提供更多資訊,將網上銷售由被動變為主動。Tequila坦言,部分已部名參加市集嘅檔主因從未有做live經驗,但都想藉呢個機會試效果和反應,為推廣生意開拓新途徑。

 

Tequila將協調各檔主開live時段,未有live時候,專區將重播之前live嘅錄影片段,以維持市集嘅熱鬧氣氛,同時充分利用網絡營銷不受時間和地域限制嘅優點,全天候進行銷售。如消費者睇live後有意購買相關產品,只要按下連結便會轉至檔主嘅網頁或Facebook,直接選購。

 

目前,網上年宵市集已完成第一階段招收檔主,獲10多份申請,出售貨品包括:曲奇、利是封、蘭花、自家酒釀、年曆、手工啤、洋酒、參茸海味、美容產品、抗疫用品等。Tequila話:「部分係朋友介紹,亦有睇到我哋宣傳而報名。收到報名後,我會審查一下,確保檔主係有信譽,而且賣正貨。」檔主中,部分向有經營網店,部分有實體店,部分本為航空從業員,因裁員而開page賣嘢。「有人個page已有萬幾個followers,亦有人係新丁,page只有幾十個like。我強調,呢個市集嘅重點係資源共享,匯集各人擁有的客源及網絡,集合力量,互相幫助推廣生意。」第二期招收檔已於111 日開始,截止日期為115日,Tequila期望呢一輪可招攬到一班賣新年裝飾品、賀年禮品、全盒糖果食品等檔主,加強網上年宵市集嘅新年氣氛。整個活動目標檔主名額為40個。網上年宵市集暫定舉行日期為1月17日至2月12日。

 

率先睇有乜賣

迎新年辦年貨,其中一樣好多人都捨得花錢買嘅係利是封。大喜慶從事利是封設計及銷售已有10多年時間,過去主要通過市集、開設臨時店舖、在百貨公司及商店寄賣等方式進行銷售,目前共有逾130個銷售點。Gerald坦言,雖然品牌設有網站,但網上銷售向來不是公司重點。大喜慶創意利是封負責人Gerald表示,今次有興趣參加網上年宵市集,其一係認同「資源共享」呢個理念,其二因為費用全免,可以一試,當作多一個渠道接觸顧客。「我哋欠缺做live嘅經驗,藉著今次機會,可以學嘢,而且通過檔主間共享網絡,有機會讓更多人認識我哋。」Gerald透露,將會在live環節推銷特別設計嘅牛年利是封。「我哋主力賣創意利是封,凸字字句或姓氏設計嘅利是封係我哋招牌貨之一,另外亦有以懷舊為主題及特別graphic 為設計嘅利是封。生肖利是封年年都有,今年牛年生肖利是封,用Q版牛牛graphic 做設計,而且附加「功能」。利是封有兩層,內層可拉動,牛仔便有眨眼、露出金牙。」

大喜慶創意利是封大喜慶創意利是封大喜慶創意利是封大喜慶創意利是封大喜慶創意利是封

 

新年係大吃大喝嘅節日,賀年食品食得過多易膩滯,所以唔少人過年前會買茶品,以便在家沖茶生津解膩。三通茶業專售新會陳皮,在新會核心產區天馬區設數百畝農場,以綠色種植方法種植新會柑。負責人Mary表示,只有在新會核心產區種植嘅柑,柑皮曬乾後先係正宗陳皮,味道甘甜,健脾益氣。由於核心產區產量有限,加上曬製陳皮需時,優質陳皮價格向來偏高。「眾所周知,陳皮愈遠年,功效愈好,但有年份嘅陳皮食一塊少一塊,所以價格只會愈來愈貴。」

三通新會陳皮

 

佢仲話,市面買得到嘅平價陳皮,多數為廣西陳皮,味道苦澀,無論食味和食療效用,遠不及新會陳皮。「講到陳皮,應該大家有見過青色嘅陳皮。其實青皮和大紅皮在中醫藥效上完全唔同。青皮食咗會破氣,中醫只有十多條藥方用到青皮,一般人應該食用大紅皮。大紅皮陳皮賣得貴,除咗產量少外,處理亦難度高,因為要待新會柑熟透先可取皮,熟咗嘅柑運送時易撞壞,所以有人用青柑嘅皮做陳皮。」

三通陳皮茶

 

Mary透露,今次參加網上年宵市集,除咗會分享如何辨別新會陳皮,仲會分享飲用陳皮茶嘅養生療效。「我哋有出品養生陳皮茶,以新會柑造嘅陳皮配合不同中國茶,例如配黑茶可降血壓和降血糖;配高山古樹普洱可化痰止咳和消滯利氣;配白茶養心養肝;配六堡茶調節血脂抗氧化。另外,我們有一款陳皮羅漢果茶,化痰止咳潤喉。」Mary表示,佢哋在新會自設茶包廠房,能確保茶品品質,同時百分百肯定使用嘅係新會大紅皮,給消費者多一重保障。佢話,將喺在live時段推出特別優惠,希望吸引多啲人試下產品,認識陳皮嘅好處。

三通陳皮莨生茶

 

即將到臨嘅農曆新年,比以往特別,因為市民大眾除了要採購賀年食品和用品外,可能會花費在搜羅抗疫用品。比亞迪醫療用品專門店發言人Terrie表示,「年宵人人鍾意行,今年取消實體年宵,難免令人失落,覺得少咗啲過節氣氛。當知道Tequila有舉辦網上年宵市集嘅概念,我哋覺得值得支持,可以俾市民大眾另一個辦年貨嘅途徑。」從商業角度,疫情爆發後,實體店生意大受影響,網上銷售既可增加產品曝光率,亦讓顧客足不出戶都買到貨品。「無可否認,網上銷售較實體店直接推銷被動,而且主要靠文字介紹商品,對於一啲涉及專業知識嘅貨品,例如醫療口罩,顧客未必能自行掌握理解不同認證嘅意思、防護效能嘅數字等。呢一方面,實體店有店員面對面講解,顧客如有不清楚不明白,可以發問,互動性較強,亦增加信心,有助銷售。」

 

Terrie話,今次有興趣參加網上年宵市集,因睇中設有live時段。「到時我哋會展示幾個不同牌子口罩,搵真人試戴,分享感覺。」佢話,即使口罩防護級數同樣達到ASTM level 3,但戴起嚟嘅形狀、觸感可以完全不同。「有啲口罩戴上後唔貼面,有啲會好『黏嘴』,即係講嘢呼吸時口罩會跟住起伏,可能同所用嘅熔噴布厚薄有關。熔噴布愈重,密度愈高,會比較硬身。呢啲資訊,消費者自行睇口罩盒面嘅資料,係唔會知道。」

比亞迪醫療口罩

 

Terrie話,買口罩除咗考慮防護能力,戴得舒適都係重點。「點之為一個合適自己嘅口罩呢?標準以外,仲有其他因素,例如尺寸、用料質地、剪裁等。防護力高都要戴得舒服,否則全日戴住口罩會好辛苦。當口罩戴得唔舒服,有人忍唔住成日又戴又除,就降低保護能力。」自從爆疫後,大眾要口罩隨身自我保護,大家對口罩防護標準BFEPFEVFE都非常熟悉,但係買嘅時候又有無考慮生產標準呢?「所指係口罩含菌量,有人戴口罩戴到爛面,其中一個可能性係口罩含菌量高,皮膚受影響。」

 比亞迪醫療口罩

 

Terrie希望通過網上年宵市集開live,分享更多有關口罩嘅資訊。「相信live對銷售有幫助,但無期望做一次live就可以好多人買我哋產品。信心需要累積,今次參加當『眾籌』,集合不同商戶嘅力量,互相分享網絡,推動銷售。我哋一向喜歡創新。」

 

每年年宵市場嘅焦點,一定係花檔。網上年宵市場當然唔會少咗賣年花年桔嘅檔主。駿思國際將會開live賣年桔,價格約$288$1688,更會提供95折優惠。

 駿思國際年桔

 

 

INFO

網上年宵市集

https://www.facebook.com/etrolleymarkets

 

 

TEXT: MaryLin

 

你或會有興趣的相關文章: 

大埔林村特色園藝小店│ 多個特色打卡位任影

灣仔利東街漿糊仔首間海外店 │必買!印花抗疫口罩 600g限定版保濕霜

相關文章
【玩樂情報】荔枝角全新室内動感遊戲│個人挑戰/組隊競技/合家歡玩樂【玩樂情報】荔枝角全新室内動感遊戲│個人挑戰/組隊競技/合家歡玩樂 【玩樂情報】荃灣海濱期間限定「癲噹開心村」│ 癲噹阿讚貓萌爆造型呃like打卡【玩樂情報】荃灣海濱期間限定「癲噹開心村」│ 癲噹阿讚貓萌爆造型呃like打卡 粉紅隨意門出沒觀塘!│4月2日快閃4地點粉紅隨意門出沒觀塘!│4月2日快閃4地點 搭港鐵人有三急去邊度解決?│港鐵車站洗手間一覽表搭港鐵人有三急去邊度解決?│港鐵車站洗手間一覽表 【玩樂情報】去野餐兩手揈揈出發│借用野餐籃方便又環保【玩樂情報】去野餐兩手揈揈出發│借用野餐籃方便又環保