過去一年，因為疫情無得去旅行，放假空閒時，小編同大家一樣會周圍去，重新認識和發現香港。上個星期，小編來到大埔，本打算買啲新鮮靚食材返屋企煮飯仔，卻無意間發現兩間專賣涼果和和中式傳統小吃嘅店舖，得到意外收穫。
未有疫情前，遇啱放假但未能遠遊，近近地都會去澳門玩兩日一夜，臨走時買啲杏仁餅、手工蛋卷及涼果等特色手信，旅程愉快又開心。等咗成年，疫情仲未退，連澳門都去唔到，喜歡旅遊如小編嚟講真係幾sad。好在呢一日，喺大埔富善街，小編搵到遊澳門嘅感覺，可以暫時一止旅遊癮。
呢間名叫「澳門鳳城手信」嘅店舖，裝潢和陳設確與澳門手信街嘅手信店有幾分相似。店前擺滿各式中式傳統小吃和涼果，雞仔餅、花生糖、蛋散、果仁糖，琳瑯滿目。小編本來行街市買餸，但竟被吸引走過嚟，因為遠遠聞到陣陣餅食香氣，而且睇到舖內炊煙四起。原來呢間店部分產品如果仁糖、杏仁餅等都係當店限量手工製，新鮮製，味道特別香脆，一般工廠量製包裝嘅完全無法複製呢種獨有嘅味道和質感。
店前賣小吃，店後係製作工場，小吃部分為當店新鮮手製。
呢間咁有澳門風味嘅小店，原來老闆真係嚟自澳門！兩人家族在澳門開店出售自製嘅杏仁餅、蛋卷和涼果，二人後來嚟咗香港，於是在大埔開店傳承家族嘅美味小吃。
杏仁餅百分百人手造，有原味和蛋黃肉心兩種味道，每次出爐秒速被人掃空。
外觀上，雖然手造杏仁餅不及機器製嘅完美，餅邊偶有崩缺，但味道絕對可口，更附加依家愈來愈罕有嘅人情味。
近年飲食潮流講求健康，為食又想健康，不妨試試呢款四寶糖，用新鮮綜合果仁造，低糖配方，很美味。
琥珀合桃，甜香鬆脆，微微焦糖香，一食停唔到口。
中式傳統餅食款式頗多，雞仔餅、芝麻餅、合桃酥、五穀酥，如果逐款買嚟試，小編開始擔心肥幾磅。
當小編懷著興奮嘅心情，打算離開富善街時，再行數十米，又被另一間涼果小食店吸引住目光。呢間「皇甘栗」，原本主打賣野生栗子，生栗子有連穀和去穀兩種，好多區內識途主婦會專程嚟買用來煲湯、炆雞或排骨、煲湯水等。另外，亦有炒栗子，每日新鮮即炒，每年只限9月至翌年5月有售。
特大招牌，而且門面企理乾淨整齊，在富善街很搶眼。
栗子粉糯香甜，而且秋冬天正係當造。炆雞美味，煲湯清甜。
好多人嚟呢間店唔止買栗子，仲會買各式涼果、果仁和水果乾！一個個圓型木桶內，放著各式各樣嘅涼果，梅、薑、欖、柑桔、檸檬、陳皮、八仙果等，應有盡有，全部係懷舊味道。
懷舊涼果款式多多，小心選擇困難症發作！
若你為健康想戒食薯片，但好想食啲香脆嘅，小編推介呢款脆蓮子，入口鬆化香脆，係健康零食。
小編一見老柑桔(左下)便忍不住手買咗，可口潤喉，適合放喺辦公室，無聊時好過食朱古力或糖。
呢間店賣栗子起家，唔止有現成栗子賣，仲用香甜栗子造雪糕。栗子雪糕內有粒粒栗子肉，啖啖濃郁栗子香；雪糕用北海道3.6牛奶鮮造，雪糕有奶香又夠滑。香港鮮造，食得安心。
栗子雪糕好多栗子肉。
栗子味之外，仲有其他涼果和特色口味雪糕如：陳皮、話梅、生薑、玄米茶、石榴等。喜歡食雪糕但對大路水果味食到厭嘅你，可以一試！
TEXT: MaryLin
你或會有興趣的相關文章：
大埔林村特色園藝小店│ 多個特色打卡位任影
https://bit.ly/3l8UWH7
手機都影到靚香港夜景│龍翔道觀景台俯瞰萬家燈火
https://bit.ly/2GTVHFD