馬鞍山新開煲仔飯店│同場加映記者親試快餐店連煲外賣| likemagazine.com.hk
Special
馬鞍山新開煲仔飯店│同場加映記者親試快餐店連煲外賣

馬鞍山新開煲仔飯店│同場加映記者親試快餐店連煲外賣

上星期,小編喺面書出咗個post,問下大家邊款美食最有「冬天嘅味道」。結果,炒栗子、煲仔飯和蛇羮叮噹馬頭,各有不同粉絲捧場。天文台預告,下星期初氣溫再度下降,可能跌至11度。天寒地凍,小編已經諗定到時食煲仔飯保暖。最近馬鞍山開咗間專食煲仔飯嘅食肆,有興趣可以一試。

 

煲仔飯係充滿港式風味嘅美食,燶燶地嘅飯焦香,真係好誘人!香港地出名食煲仔飯嘅食肆有好幾間,例如位於西營盤、旺角、油麻地嗰幾間,好多人都識窿路。如果你家住新界東,突然想食煲仔飯又唔想走咁遠,原來被評為「美食沙漠」最近開咗間煲仔飯專門店。呢間位於馬鞍山MOSTown新港城中心嘅「點煲」,主打係全港首創備長炭煲仔飯用炭火煲嘅煲仔飯。識食之人應該知道,炭火煮嘅煲仔飯比一般電爐煮熱嘅更香、更脆,因為火力均勻啲,剛柔並重,唔會有火太猛而煮燶飯情況。

 

好味嘅煲仔飯除咗講求火喉外,選料都重要。呢間店出品嘅煲仔飯,米選用泰國金鳳米,米香味濃,而且較乾身。師傅會加入黃金比例水量,令煮出嚟嘅飯又香噴噴之餘,軟硬適中,粒粒分明。食煲仔飯嘅人十居其九都鍾意食飯焦,呢度嘅煲仔飯用備長炭烤焗,而且師傅控制火喉功力十足,飯焦金黃薄脆。坊間好多食肆為加快煲仔飯製作流程,會用猛火煮飯,雖然有飯焦,但係燶嘅,就算再香,食咗分分鐘壞健康。

 

煲仔飯嘅另一個勾魂之處係豉油,豉油嘅作用係提鮮,加添美味。不過呢間店強調,即使唔加豉油,一樣食到煲仔飯嘅美味,原因又係備長炭作怪,火力均勻,鎖住食材原味,加埋飯香,為味覺帶來最大嘅滿足感。特別一提係,店家提供煲仔飯提味「秘密武器」,就係自家製豬油。煲仔飯上枱時熱辣辣,淋上香氣十足嘅豬油,撈埋嚟食,人間美食。

 

講咗咁耐,呢間店有乜款式嘅煲仔飯呢?招牌必食係豉汁白鱔煲仔飯。煲仔飯要煲得好已經唔易,仲要向難度挑戰加豉汁白繕,可以話係味道大挑戰。店家咁有信心,因為自設魚缸養鱔。識食嘅都知道,鱔如何處理不善,會有陣泥味,影響食味。呢間店會將白鱔會放喺魚缸作2天深層淨化,當有order時現場生劏,鱔肉非常新鮮,加理豉汁嘅鹹香,滋味無窮。

 

要試有新意嘅煲仔飯,推介芝士櫻花蝦金蠔銀魚煲仔飯。櫻花蝦、金蠔和銀魚,全部係鮮味系,金蠔用上本地流浮山鮮曬貨色,加上港人最愛嘅芝士,新口味有特色。食肉獸可以一試海膽安格斯牛肉煲仔飯;海鮮迷就要試金銀蒜開邊蝦煲你飯。素食者都有啖好食,呢度有坊間少見嘅羅漢齋煲,食得健康。

 

近來疫情嚴重,10/12起連續14天晚上6點後禁堂食,想食煲仔飯做晚餐嘅話,唔使擔心無口福。因為呢間店設原個煲你飯外賣,大家可以買返屋企慢慢歎。

 

INFO

點煲

地址:馬鞍山新港城中心 2 2203號舖

電話: 2363 3166

 

同場加映:快餐店連煲外賣煲仔飯

一到冬天,好多食肆都推出煲仔飯,就連連鎖快餐店都食得到。小編上星期就親試大快活嘅煲仔飯連煲外賣,非常滿意。

 

煲仔飯以紙皮紙盒裝住,小編由快餐店返抵家路程約15分鐘,抵家後立即開箱,仍然熱辣辣。店員很貼心,特別提醒打開紙盒時要小心,而紙盒包裝頗保溫亦穩陣。

 

打開煲即聞到陣陣飯焦香,小編習慣先淋豉油,然後再冚蓋焗飯一陣。

 

以為快餐店出品嘅煲仔飯水準一般?其實呢個算唔錯,一夠熱,二飯香,三餸都算多。飯焦係有嘅,唯廚師煲飯時可能心急咗少少,部分飯焦燶咗,扣少少分。整體而言,食味不錯,貪方便又為食嘅你值得一試。

 

 TEXT: MaryLin

 

你或會有興趣的相關文章: 

大埔林村特色園藝小店│ 多個特色打卡位任影

https://bit.ly/3l8UWH7

手機都影到靚香港夜景│龍翔道觀景台俯瞰萬家燈火

https://bit.ly/2GTVHFD

 

逆市搵工無有怕!即睇最新熱門招聘公司:http://bit.ly/2OQKwP1

 

相關文章
【飲食情報】前四季總廚推麵包零售品牌│酒店級手工麵包超市上架【飲食情報】前四季總廚推麵包零售品牌│酒店級手工麵包超市上架 【集體回憶】再見了!「可口可樂」經典玻璃樽│2022年新樽登場加環保元素【集體回憶】再見了!「可口可樂」經典玻璃樽│2022年新樽登場加環保元素 沙田市中心燒烤樂園│套餐包工具 / 親手燒乳豬沙田市中心燒烤樂園│套餐包工具 / 親手燒乳豬 尖沙咀親民價歎星級意廚出品│爆肉pizza媽媽味肉醬意粉尖沙咀親民價歎星級意廚出品│爆肉pizza媽媽味肉醬意粉 防疫放寬閨密聚會│精選4間酒店特色下午茶防疫放寬閨密聚會│精選4間酒店特色下午茶 【飲食情報】日本燒牛丼元祖登陸旺角│即叫即燒鐵板燒烤牛/豚肉【飲食情報】日本燒牛丼元祖登陸旺角│即叫即燒鐵板燒烤牛/豚肉 【飲食情報】Pepper Lunch有素食!│期間限定鐵板植物漢堡扒【飲食情報】Pepper Lunch有素食!│期間限定鐵板植物漢堡扒 當造台灣鳳梨唔止係水果│食剩做果乾/ 果醬/沙冰/糖漬當造台灣鳳梨唔止係水果│食剩做果乾/ 果醬/沙冰/糖漬