漫畫迷必訪埼玉新景點│所澤Sakura Town奇幻之旅

旅遊 2020-12-02

小編作為「鄉民」，無返「鄉下」成年，同大家一樣好掛住「鄉下」嘅人、物、事。都係嗰句，肉身不能遠行，只要有網絡，暫時眼睛去旅行止癮先。今次想同大家分享嘅旅遊新事，地點在埼玉縣。最近當地有全新景點─所澤Sakura Town，園區內除咗有別具特色嘅酒店、商店、餐廳等之外，重點係一座由世界級建築大師日本設計師隈研吾設計嘅「角川武藏野Museum」。呢座建築物唔止外形突出，更內有乾坤，集博物館、美術館及圖書館於一身，大師出手，非同凡響。小編真係好想親身去睇下！

角川武藏野Museum嘅外形富有「設計味」，隈研吾以大地破土而出嘅熔岩為靈感，建築物外牆用咗約2萬塊、每塊重達50至70公斤來自中國山東嘅巨型花崗岩塊砌成，岩巉起伏嘅外貎，無論遠觀或近睇都非常壯觀。

呢座建築物唔止外形特別必要打卡；內裡更設有圖書館、美術館和博物館，同樣給遊人萬分驚喜。必要用多少少篇幅介紹嘅係圖書館，藏書近3萬本，全部係館長精心挑選，除了角川集團的出版物、角川源義文庫、山本健吉文庫和個人藏書，仲有其他不同出版社嘅小說、漫畫、圖冊等，包羅萬有。

圖書館不獨有書香，布置方面頗有心思，擺放咗唔少藝術品，加添藝術氛圍。圖書館最吸眼球嘅地方，就係一個名為「書架劇場」嘅地方，四邊嘅書架高約8公尺，置身其中，好似走進《哈利波特》嘅故事世界裡，非常震撼。至於博物館和美術館，不定期有特別展覽。

所澤Sakura Town園區內，要欣賞隈研吾嘅傑作，仲有一個不能錯過嘅地方，呢個就係武藏野坐令和神社。呢個由隈研吾監修設計嘅神社，極具現代感。神社供奉嘅係從東京大神宮所請嚟嘅天照皇大神，據講祈求姻緣非常靈驗。神社內部都值得細心觀賞，天花上嘅一對鳳凰由曾參與太空戰士繪製嘅知名繪天野喜孝手繪，仔細精美，活靈活現。

神社旁有人工湖，湖面平靜如鏡，神社倒映在湖面上，景色優美。這個美景，更令神社被封為「日本的烏尤尼鹽湖」，絕對是打卡熱門之地。所澤Sakura Town園區係角川集團嘅匠心之作，而角川集團在日本嘅影視、出版類創作行業舉足輕重，呢座神社推出嘅期間限定御守都極富創意。例如之前一款上面有很多「〆」圖案的御守便成為話題作。原來「〆」在日文有截稿嘅意思，從事創作行業嘅人見到呢個御守應該會急不及待擁有。