食呢碗麵嘅係傻瓜？│麵醬套裝傻瓜都煮得到

只不過約一年時間無去過台灣，感覺已經似陳年往事。按現在疫情估計，年底前重遊台灣機會渺茫，唯有買台灣美食慰藉心靈。小編最近愛上嘅係一個「傻瓜麵」套裝，內裡有齊麵和醬，基本上不需要任何廚藝，按序煮麵加醬拌勻，就可以炮製出一碗充滿台式風味嘅拌麵。

好多人一聽到「傻瓜麵」呢個名就會問：「係咪傻瓜先食呢款麵？」當然食呢個麵嘅人未必係傻瓜，煮呢個麵嘅人都唔係傻瓜，但唔排除其他人覺食呢個麵嘅人係傻瓜。點解咁講呢？因為「傻瓜麵」其實係一個淨麵，食時拌油、醋、豉油和辣油等，食法很簡單。小編在台北旅遊時，曾到專吃傻瓜嘅食店食傻瓜麵，係咪好傻瓜呢？

其實，儍瓜乾麵又有另一個名，叫「福州乾麵」。據講係大約50年代，來自福洲嘅退役兵在台北小南門一帶開店賣嘅麵。有一個說法係，由於台語「煠寡麵」(即煮碗乾麵)嘅音與國語「儍瓜麵」近似，所以慢慢當地人就叫呢個款麵食做「傻瓜麵」。

而小編最近不時用佢嚟快速醫肚嘅「傻瓜麵」套裝，係由台灣南投埔里一間小店「山里麵」出品。「山里麵」傻瓜麵 X 有醬有麵招牌組特別之處係有齊麵和醬，而醬油係自家調味，只要按適合份量拌均煮好嘅麵條，便可輕鬆炮製出一碗美味嘅傻瓜麵。

整個麵醬套裝，美味嘅關鍵係自家調配嘅「傻瓜醬」，用上蔥、花椒、八角等天然食材，加醬油小火慢燉一夜。傻瓜醬味道甘甜溫順，八角花椒添加食味層次，細味下絕不死鹹，原來秘密是加咗冰糖，把醬汁變得溫潤，而且能夠把味淡嘅麵條升華。自行在麵上加啲蔥花或拌以青菜、滷蛋一起食，一碗煮法簡單嘅麵立時變得不簡單，食起來很豐富。

套裝內嘅醬油：傻瓜醬 、甘單蒜油 和麻花辣油，唔單止用來拌麵，更可以用嚟煮其他菜肴。傻瓜醬味道微酸甘甜，仲有啲鹹香，用來做水餃沾醬或者滷肉最適合，甚至用來做醬燒菜式都一流。至於甘單蒜油，炒菜或涼拌都係好幫手。麻花辣油因為加入八角花椒等，麻辣帶香，刺激味蕾，喜歡辣味嘅人用來做任何菜式，都能得到辛辣味嘅快感。

INFO

www.starryc.com