手機都影到靚香港夜景│龍翔道觀景台俯瞰萬家燈火

今次小編去睇夜景嘅地方就係龍翔道觀景台。由於呢個地方位於繁忙嘅龍翔道旁，高速公路車來車往，或者大家平時搭車都曾經過，但未必留意到，更莫論落車去睇睇。不過，如果你本身有揸車，又有加入車友谷，應該知道呢個地方，因為不時有車友貪泊車方便，鍾意約埋喺度聚下。

有車族唔使小編教，只要查下地圖，就會知道點去龍翔道觀景台。唯一提點係入口位有少少「唔起眼」，好容易錯過咗。過咗頭嘅話，因為處於高速公路上，起碼去到澤安邨大埔道先可以調頭。之後仲要兜大個圈，重新上龍翔道往石硤尾方向，先可以再入，所花時間都唔少。

至於無車族想去龍翔道觀景台，可以坐九巴在豐力樓站落車，行一小段路就到。如果落車位在對面線，附近有天橋可以行去對面。

龍翔道觀景台現場其實幾幽靜，雖然有街燈，但光度一般，所以唔建議自己一人去，最好有伴多個照應。呢度有圓形涼亭，都有幾張公園凳，大家可以坐低慢慢欣賞夜景。依家時已入秋，觀景台位置幾當風，夜晚去記住帶多件外套。觀景台外面有公廁，人有三急唔使擔心。

觀景台前方係山坡有樹叢，可能日久少修，近年香港雨水多，樹和草生長茂盛，其實部分景觀被遮住，令人覺得個view差一點點。想睇得wide，就要往高處。小編建議大家行多幾步，沿住龍駒道走，去到對面新落成嘅樓盤「緹山」前的路邊，呢個位嘅夜景view會令你好難忘。

由於位於半山上，從高處俯瞰，景色廣寬更多，加上前方係非常繁忙嘅龍翔道，在強烈嘅路燈映襯下，繁華都市感非常突出。如果識啲影相技巧，玩埋光軌夜攝，就可以影到一啲唔普通嘅夜景靚相。