15分鐘直登嘉頓山│180度無遮擋賞西九龍美景

逆境之下，每日面對咁多人和事，要保持正能量，你估咁易架？情緒就好似一隻裝水嘅杯，當負面情緒一點一滴積累，水杯裝滿水滿瀉，情緒就會爆。所以呢，識得喺適當時候將負面情緒釋放出嚟好重要。平衡心靈人人方法唔同，小編就鍾意上山。上到山，睇見靚風景，有時乜都唔做，已經舒服好多。

一聽見上山，好多平時唔做開運動嘅人就耍手擰頭，覺得山長水又遠去到郊區，辛苦到死。今次小編又嚟介紹大家一個輕鬆上山睇靚景嘅地方，身體好腳力好，唔使15分鐘可登頂，睇到超正西九龍景。呢個睇景好地方，唔使搭車又搭船先去到，就喺九龍鬧市中。呢個地方就係深水埗嘉頓山。

嘉頓山本來喺地圖上係搵唔到，因為名字係香港人自創嘅。所指嘅地方，其實係深水埗與石硤尾之間的一個小山丘─喃嘸山。由於山丘就在嘉頓麵包總部大樓附近，於是當區居民稱呼呢座山做「嘉頓山」，方便記認。

上山嘅地方就在荷美樓青年宿舍旁邊。上山嘅路其實係一條晨運徑，好多居民平時都會走上山，做下運動，呼吸下新鮮空氣。晨運徑全程上樓梯，石屎梯級，小朋友都行得輕鬆。沿路上，行到半路，已經可以飽覽深水埗一帶公共屋邨和唐樓的景觀。行到上頂，走近山邊，可以睇到好似成個香港喺腳下一樣嘅風景，望遠啲仲可以望到昂船洲大橋。

望清楚呢個地方，係咪好熟口面呢？係呀，唔少經典電影和高收視嘅電視劇都喺度取景，包括：《喋血街頭》、《怒火街頭》、《十八年後的終極告白》等。登上嘉頓山頂可以睇到咁遼闊嘅九龍景，原因之一同舊啟德機場有關。昔日嘅啟德機場位於市中心，為保障航道安全，當年政府在城市規劃時，為九龍區嘅建築物定下安全高度限制。因為咁，在嘉頓山上，大家可以俯瞰到西九龍的美景。每到日落時分，呢度更係觀賞「鹹蛋黃」落山嘅好去處。

落山時，唔想走原路，其實山頂旁有另一條梯級路，路上會繞過石硤尾水庫，落到山下就是前西九龍裁判法院。呢座建築物於2010年出租給薩凡納藝術設計大學作為香港分校，但在2020年，因校方嚴重虧損而停止運作。

上山落山，睇埋靚風景，一個小時內完全可以。而且地點就在交通便利的九龍深水埗，唔使舟車勞頓。下次感覺自己好想「爆」，要搵可地方「唞下氣」，不妨考慮下嘉頓山呢個好地方。