工作太忙變肥易攰憂鬱│咪以為年紀大所致│可能係甲狀腺低下

香港人做嘢勤力搏到盡，工作佔據生活嘅大部分。永無休止咁工作，令人缺乏運動，睡眠不足，影響健康。最近有研究指，每周工作53至83小時嘅人，相比每周工作36至42小時嘅人發生甲狀腺功能低嘅風險高2倍。甲狀腺功能低下，影響身體嘅代謝功能，會令人變肥、面浮腫、甩頭髮、記憶力變差等。

甲狀腺控制代謝

甲狀腺係生喺喉結下方嘅內分泌器官，好似一對蝴蝶咁包覆喺頸部氣管嘅前方。甲狀腺會分泌甲狀腺素，控制身體每個器官嘅新陳代謝過程，包括心臟、肌肉、眼睛、骨骼、皮膚，甚至影響情緒。甲狀腺功能低下係一種內分泌疾病，當甲狀腺無法分泌足夠嘅甲狀腺素嚟提供身體使用，會令人變肥胖、疲勞，甚至憂鬱，嚴重嘅話更可能出現關節疼痛、不孕，甚至心臟疾病。

女性比男性發病高

值得留意係，甲狀腺低下發生喺女性身上機會率較男性高2至8倍，尤其中老年女性更要注意。甲狀腺低下患者喺初期可能唔注意身體易疲累、體重增加等問題，會以為同年紀大，身體機能老化有關，令人容易忽略而無及早治療。但當新陳代謝持續變慢，就可能出現其他比較明顯嘅症狀，例如肌肉疼痛僵硬或無力、頭髮變細易掉、心跳變慢、經血量增多或經典紊亂等。

工時長可能致病

甲狀腺低下成因主要有自體免疫疾病、曾做甲狀腺切除手術、藥物影響、接受放射線治療、碘攝取不足。最近外國有研究更指出，工作過勞都有增加甲狀腺功能低下嘅風險。研究人員分析咗2千多名韓國全職上班族嘅數據，並且進行血液檢測，發現工作時數每增加10小時，甲狀腺低下嘅風險就變高。韓國人工時長，在世界上數一數二，同香港人不相伯仲。雖然工時長和甲狀腺低下之間嘅關係仲需要進一步研究，但研究已令人關注到工時長對健康嘅影響。

你或會有興趣的相關文章：

多飲水食蔬果仍然便秘│專家建議3個另類方法

上班族壓力大心情差│必食呢5種營養素助舒壓