一日3餐快餐熱量不超標│3個最低熱量套餐選擇

成日話食快餐唔健康，但快餐食物香口美味，好多人忍唔到口唔食。如果去快餐店要正常點餐，仲要食足三餐，點先可以控制熱量攝取，兼且唔超標呢？M 字頭快餐店最近推出「漢堡研究所」電子書，裡面除咗有唔少關於佢哋餐廳嘅趣味冷知識，仲提供咗3個最低熱量套餐，啱晒想食快餐又唔想肥嘅人作為參考

肥胖因攝入熱量多過消耗

肥胖成因係熱量吸數大於付出。熱量主要透過食物及飲品得到。如果經常食用高脂和高糖分食物，而且進食蔬果、全穀類食物及豆類等高纖食物不足，容易攝取過多熱量，令體重增加。咁每日需要攝取幾多熱量呢？其實因人而異，與年齡、性別、工作性質及活動量有關。概括而言，每日成人男性攝取熱量約2250至3000千卡，女性則為1800至2400千卡。但由於多數人長時間在office工作，每日步行活動量少，能夠消耗嘅熱量低，外國專家指，成人每日攝取熱量，實際上可能要減少一啲，建議女性唔超過1500千卡，男性不應超過2000千卡。

三餐快餐解決唔超標

如以專家建議嘅攝取熱量計算，成人每餐理想唔多過600千卡。去M字頭快餐店點餐，三餐點樣點餐，可以控制攝取熱量喺呢個限額之內呢？麥當勞最近推出「漢堡研究所」電子書，內裡列出3款低熱量套餐。

早餐：麥芝蛋飽+濃香咖啡

熱量：305千卡

午餐：烤雞凱撒沙律+粒粒粟米+熱檸檬茶

熱量：341千卡

晚餐：板燒雞腿飽+蘋果批+凍檸檬茶

熱量：596千卡

仲有餘額食零食

如按上列點餐建議，一日食足3餐快餐，攝取熱量不過1,242千卡。女性仍有每日有258千卡餘額食零食，例如1包4條裝嘅黑朱古力餅(約212千卡)和1條魚肉腸(約39千卡)。至於男性，約有758千卡餘額，在每餐之間食小食頂肚餓，例如6塊全麥消化餅(每塊約70千卡，共420千卡)加1包55克燒烤味薯片(約302千卡)。以上餐膳組合只供參考，如有營養方面嘅疑問，最好諮詢專業人士。

你或會有興趣的相關文章：

宅在家自煮隨時攝鈉超標│4種易中伏鈉偏高食物

氣炸鍋用少啲油真健康？│高溫烹調一樣釋致癌物