頸椎有事全身唔妥│6個加快頸椎老化的動作| likemagazine.com.hk
Beauty & Health
頸椎有事全身唔妥│6個加快頸椎老化的動作

頸椎有事全身唔妥│6個加快頸椎老化的動作

未老先衰無人想,但我哋日常生活裡,總會做咗啲事,令自己身體加快衰老。特別係一啲對頸椎健康有影響嘅習慣,更應該早知道早啲改,因為頸椎一旦出問題,就會影響全身。

 

1 低頭玩手機

係呀,又關玩手機事!食飯玩手機、搭車玩手機、行路玩手機、去廁所都玩手機……任何時候我哋都同手機不可分離,經常低住頭,心靈滿足,但條頸就傷囉!原來頸椎喺正常姿勢下呈「C」字形弧度,但當我哋低頭,頸椎就要多承重3倍嘅壓力。頸椎本來好脆弱,加上我哋日以繼夜低頭,頸椎勞損,未到30歲就開始退化。頸椎是頭部與身體神經、血管、經絡連接的通道,一旦頸椎出問題,常見徵狀有覺得手臂與手指麻木,嚴重啲有成日見暈,甚至下肢活動受影響。咁想咁快老,提早面對各種身體老化問題,就算有需要經常用手機,都應維持良好坐立姿勢,提醒自己減少低頭姿勢。另外,每用手機約30分鐘,就要停一停休息數分鐘,而且做下伸展動作,舒緩肩頸壓力。

 

2 攤坐軟梳化

軟綿綿嘅梳化令人自然放鬆起嚟,尤其上班族做足成日累到無朋友,返到屋企「攤」落梳化,嗰種感覺超正!不過,舒服都要有個點,唔好長時間「無腰骨」咁「攤坐」喺梳化,因為呢個姿勢唔止引起頸椎嘅傷害,更會增加腰椎嘅壓力,增加罹患椎間盤突出嘅可能。「攤」夠就要坐番直,保頸椎脊椎腰椎。平時最好少坐太軟嘅梳化。如果真係累,瞓喺梳化總比「攤坐」好。

 

3 枕頭高度唔啱

對繁忙嘅上班族嚟講,瞓覺時間好奢侈,要珍惜瞓覺時光,瞓得好發個甜夢,一個舒適嘅枕頭係關鍵。奈何好多人用開嘅枕頭,唔係過高就係過低,梗係唔舒服,莫講瞓得唔好,長久更對頸椎帶來傷害。若果你經常有「瞓厲頸」情況,除咗要留意睡姿外,好大機會因枕頭高度唔啱。改善方法當然係調整枕頭高度。最佳嘅枕頭高度係能夠支撐頸椎嘅生理曲線,平睡、側睡都會為頸椎唔添加壓力,或者令頸部懸空無承托。

 

4 單邊揹包包

無論男女,出街都有大堆隨身物,用個包包袋住。重如石嘅包包,切忌單肩揹,因為會令肩膀變得一高一低,長期會使肩膀肌肉處於收縮狀態,唔止會有酸痛,更容易使頸椎嘅壓力不平均,損害頸椎健康。可以嘅話,包包以背包款式最理想,揹起時兩邊肩膀平均分配重量,減輕一側肩膀及頸椎嘅壓力。

 

5 趴喺枱上

上班族食飽午飽,瞓魔急call,於是趴喺枱上眠一眠。原來呢個動作非常容易引起頸椎老化。由於人嘅頭部佔全身重量約1/10,正常情況下,頸椎嘅生理弧度可以減輕和緩衝重力對腦部嘅衝擊。但當你趴喺度瞓,就會令頸椎嘅生理弧度消失,頸椎關節錯位變形,更有機會令頭部嘅血液供應不良。成日趴喺枱面,無論係瞓覺、睇文件或做其他事,日久就知大件事!等到出現肩頸酸痛、頭痛等問題,頸椎已勞損得嚴重。唔想頸椎老得快,趴喺枱瞓或做嘢嘅姿勢要戒,真係好累要唞唞,都唔好直接將頭枕喺胳膊上,最好搵個睡枕墊高,避免頸椎彎曲而添加壓力。

 

6 長期著高跟鞋

女生著高跟鞋,有實際需要,亦有人單純為靚。唔理咩理由,事實係著高跟鞋會令重心向前移,造成椎骨間嘅接觸面變小,特別係腰椎和頸椎,受功不均,長期下來會老化。如有工作或實際需要著高跟鞋,改善方法係盡量減少穿著時間,畀身體唞一唞。高跟鞋高度有自主權嘅話,唔好著太高。若只為貪靚而著高跟鞋,自己衡量要健康定要靚。

 

 

你或會有興趣的相關文章:

瞓醒總覺周身痛│可能因為瞓覺無翻身!

辦公室位坐得唔舒服│揾出上班族周身痛癥結

 

逆市搵工無有怕!即睇最新熱門招聘公司:http://bit.ly/2OQKwP1

 

TEXT: MaryLin

 

 

相關文章
戴口罩都仲未放心?「減低身邊病毒量」才是上上策戴口罩都仲未放心?「減低身邊病毒量」才是上上策 生活忙碌日久積累愈瞓愈累│假日瑜伽拉筋操全身鬆一鬆生活忙碌日久積累愈瞓愈累│假日瑜伽拉筋操全身鬆一鬆 30分鐘哈達瑜伽│平衡陰陽能量促身心健康30分鐘哈達瑜伽│平衡陰陽能量促身心健康 恒常做站立前彎練習 | 舒展筋骨平靜身心恒常做站立前彎練習 | 舒展筋骨平靜身心 少運動下身循環慢現痛症 | 簡易瑜伽提升髖部靈活性少運動下身循環慢現痛症 | 簡易瑜伽提升髖部靈活性 在家工作的瑜伽Break | 大腦放鬆身體動起來 在家工作的瑜伽Break | 大腦放鬆身體動起來 天氣熱食酸甜味菜式更開胃│3道青森蘋果入饌簡易菜式天氣熱食酸甜味菜式更開胃│3道青森蘋果入饌簡易菜式 最近難入眠瞓得唔好?│睡前瑜伽提升睡眠質素最近難入眠瞓得唔好?│睡前瑜伽提升睡眠質素