超市購糧隨時中招│超市4大藏菌位| likemagazine.com.hk
Beauty & Health
超市購糧隨時中招│超市4大藏菌位

超市購糧隨時中招│超市4大藏菌位

香港疫情未有遏止跡象,無乜事唔使返工嘅話,大家都係唔好出街,留喺屋企。唔出街都要食,所以近來唔少人去超市買糧入貨。超市由朝到晚人來人往,甚至可能有隱形帶菌者幫趁過,而唔小心留下病毒,若果你無做足防疫措施,隨時將病毒帶回家。疫市下,行超市購糧時有乜要注意呢?

 

1 手推車

行入超市,多數人第一個動作就係拎部車仔,方便購物。Bingo!手推車手柄向來係最污糟嘅工具之一,沾細菌量驚人。有資料顯示,超市嘅手推車手柄上嘅細菌量大約係馬桶沖水按鈕嘅270倍,每平方有8112菌數,好得人驚!手柄上滿布沙門氏菌、大腸桿菌,金黃葡萄球菌等,唔想惹菌上身,建議使用前宜先用酒精濕紙巾拭抹,求安心。

 

2 冷凍櫃門柄

疫市期間留在家中,日子漫漫長,唔少人買糧都會選擇保存期較長嘅食品,除即食麵、罐頭等大受歡迎外,冷凍食品都係自家開餐嘅好選擇。行到冷凍櫃,玻璃因為溫差而有層霧,睇唔清楚裡面有乜買,打開櫃門先!Bingo!原來冷凍櫃嘅門柄比手推車嘅更污糟,有指相比手機,細菌量係1235倍。使用手推車人流,或者遇到愛心店長,喺疫情期間會幫手加強清潔,但冷凍櫃嘅門柄就……相信超市未必會定時去消毒。大家開門後,求穩陣,記得用酒精搓手液潔手。

 

3 散裝貨

近來行超市,發覺多咗人戴住手套去shopping。睇落好誇張,但講到底為自保。點解佢哋要咁做呢?其實行超市嘅人都鍾意乜都睇,乜都拎上手睇,就算未必買,都要拎上手研究一輪先放番低。人人都摸下,散裝貨品表面當然有菌。有資料指,超市商品嘅病菌比寵物碗多11倍。非常時期戴住手套揀貨,又係自求安心。

 

4 生鮮食品

包裝貨品有獨立包裝,返到屋企除去包裝,內裡食品不受病菌影響,但生鮮食品呢?超市裡最人頭湧湧嘅,通常係生鮮食品部,人多手多多,病菌聚集量升升升。由於生鮮食品唔方便隨便噴消毒水,有估計其病菌係牙刷嘅2140218倍,每平方約有5666667嘅菌數。所以呢,所有生鮮食品買返屋企後,煮食前要徹底清洗。

 

買糧完畢後,大家要當自己去完廁所一樣,一定一定一定要潔手。最好當然係用清水及梘液,真係唔方便嘅話,都要用75%酒精搓手液徹底潔手7個部位約20秒。

 

你或會有興趣的相關文章:

襪子應正面洗定反面洗?咁樣洗襪唔臭又乾淨

研究指魚生內寄生蟲激增│誤食可致過敏腹痛屙嘔

 

逆市搵工無有怕!即睇最新熱門招聘公司:http://bit.ly/2OQKwP1

 

TEXT: MaryLin

 

相關文章
執笠倉尋寶好物推介│貓爪按摩棒消酸痛減腳腫執笠倉尋寶好物推介│貓爪按摩棒消酸痛減腳腫 新年暴食飽滯肚谷│4招舒緩飽滯不適新年暴食飽滯肚谷│4招舒緩飽滯不適 冬天瑜伽|懶人暖身教學 冬天瑜伽|懶人暖身教學