雞蛋營養豐富助大腦發育│日本媽媽創意便當激發食慾

健康及美妝 2020-03-23

為人父母愛錫子女，關心佢哋健康，常擔心小朋友吃得不夠營養。父母們與其買各式各樣營養補充劑畀小朋友服用，點解唔簡單由日常飲食入手？從營養學角度，雞蛋被譽為近乎完美嘅食物，營養豐富，更有助大腦發育和記憶力。

雞蛋食蛋白定蛋黃好？

雞蛋營養豐富，當中嘅蛋白質含有人體所有必需氨基酸，係優質且全面嘅蛋白質來源。雞蛋裡嘅脂肪以不飽和脂肪酸為主，有益心臟健康。有人會問，雞蛋包含蛋黃和蛋白，食邊部分可以得到最多嘅營養呢？答案係應該食全蛋！因為蛋黃和蛋白各含不同營養啊！蛋白只含蛋白質，而蛋黃則含有促進腦部發展嘅膽鹼，有助視力健康嘅葉黃素及玉米黃素，以及多種唔同維他命如A、D、E、K、B12、葉酸及礦物質等。

小朋友每日食1至2隻蛋

不過又有家長擔心，小朋友食蛋太多礙健康，而且會致膽固醇過高。的確，雞蛋內有一定分量嘅膽固醇，不過雞蛋裡都有幫助降低膽固醇嘅不飽和脂肪酸成分，而且食物入面嘅膽固醇只係佔身體裡嘅膽固醇約兩至三成，其餘七至八成都係由肝臟自行製造。其實父母唔使過分擔憂，小朋友發育成長需要膽固醇，以幫助製造膽汁、維他命D及部分荷爾蒙等。小朋友缺乏蛋白質嘅話，或較同齡孩子瘦弱，免疫力亦較差，亦會影響頭髮、皮膚、指甲等身體各部分的正常成長。根據衛生防護中心「健康飲食金字塔」嘅指引，2至5歲幼兒每日進食肉、魚、蛋及豆製品等應為1.5至3両，6至11歲兒童則為3至5両。一隻中型雞蛋嘅蛋白質含量，約與一両肉，即約乒乓球大小嘅肉相若。小朋友每日食一至兩隻蛋係可以嘅。