過勞損腦力令人變蠢善忘│5大建議減壓放輕鬆| likemagazine.com.hk
Beauty & Health
過勞損腦力令人變蠢善忘│5大建議減壓放輕鬆

過勞損腦力令人變蠢善忘│5大建議減壓放輕鬆

香港人工作忙,由朝做到晚,身心疲累。做到攰,休息一下體力就可以恢復;不過原來操勞過度,有可能損腦力,令人反應遲鈍、變蠢、無記性。

 

大腦缺休息反應慢

話說台灣有一位科技公司高層因為要決定一項大投資,壓力大到爆煲,瞓唔到覺,搞到日間精神差、經常發脾氣,而且變得健忘,成日唔記得呢樣嗰樣。佢見自己唔對路,擔心患失智症,於是去醫院求醫。醫生話,因過勞而影響腦力,原因有幾個:第一,過勞導致自律神經失調,降低睡眠質素,令大腦無法得到充足休息,影響日間專注力;第二,工時太長,大腦缺乏刺激,變得遲鈍;第三,有人因為壓力大而依賴飲酒食煙放鬆減壓或助眠,對大腦造成不良影響;第四,長期受壓使身體壓力皮質醇偏高,導致腦萎縮。

 

研究證壓力令腦腿化

台灣有醫生曾經做研究,搵嚟68位勞工參與,用「近紅外光腦光譜儀」測大腦前額葉功能,結果發現,過勞指數愈高,大腦反應愈慢,專注力和記憶力都變差。醫生解釋,由於大腦前額葉係大腦嘅總指揮,雖然大腦發展過程中最遲成熟,但亦係最容易受壓力影響而退化。

 

5大建議減壓放輕鬆

唔想因為過勞高壓而變蠢鈍,以下生活工作5大原則,有助你工作生活放輕鬆。

1 「運動333

常運動身心健康,但點做運動至對身體好呢?建議採用「運動333」原則,即每周運動3次,每次超過30分鐘,而且運動時心跳每分鐘到130下。另外,多食含豐富色胺嘅食物如:燕麥、香蕉、魚類、乳酪、雞肉、花生和黑朱古力等補充色胺酸。色胺酸係人體8種必需胺基酸嘅一種,改善睡眠質素,瞓得好,有助抗壓。

 

2 腹式呼吸助眠

生活工作太忙,壓力大,經常難入眠,可試採用腹式呼吸,幫助身體肌肉放鬆,讓大腦冷靜,幫助睡眠。夜晚上床瞓覺時,建議先將室內燈光調暗,然後嘴巴輕輕吐氣,將空氣吐盡,雙手可以輕放喺腹上,感受到腹部慢慢下降。然後用鼻緩慢吸氣,雙手感受空氣吸入而使腹部鼓起。日常工作時,要適時休息,勿讓自己長期處於繃緊狀態。

 

3 學識say no

人力有限,雖然你意志無限,但都要接受現實,總有做唔到或做唔嚟嘅時間。工作上要學識say no,唔好超負荷。適當調整工作環境,減少對工作不切實際嘅期望,對減壓,放鬆神經有幫助。

 

4 培養興趣

工作重要,但生活都不可少。工作只係生活裡一部分,唔係全部,所以工作以外培養其他興趣,增加大腦嘅多巴胺,增加體內「快樂因子」。

 

5 交朋結友

都係嗰句,人生唔係只得工作,工作以外,培養社交關係,朋友間互相鼓勵,減壓打氣。

 

 

你或會有興趣的相關文章:

香蕉唔止香甜有營養│唔講唔知香蕉7個用處

久坐唔止養出豪華臀│日坐8小時以上更易憂鬱

 

 

TEXT: MaryLin

相關文章
在家工作的瑜伽Break | 大腦放鬆身體動起來 在家工作的瑜伽Break | 大腦放鬆身體動起來 恒常做站立前彎練習 | 舒展筋骨平靜身心恒常做站立前彎練習 | 舒展筋骨平靜身心 打造超強體質!小球藻 護好「腸道」,排走「重金屬」, 補充「均衡營養」!打造超強體質!小球藻 護好「腸道」,排走「重金屬」, 補充「均衡營養」! 習慣對不好的事批判│感恩靜心練習 回到喜悅習慣對不好的事批判│感恩靜心練習 回到喜悅 月經期間的紓緩練習 | 靜心調理經期緩腰痛月經期間的紓緩練習 | 靜心調理經期緩腰痛 晨早起床做瑜伽│新一天由陽光好心情開始晨早起床做瑜伽│新一天由陽光好心情開始 向日本OL偷師!纖體美肌首選小球藻向日本OL偷師!纖體美肌首選小球藻 最近難入眠瞓得唔好?│睡前瑜伽提升睡眠質素最近難入眠瞓得唔好?│睡前瑜伽提升睡眠質素