減肥唔食飯？當心缺米氣好傷身！ 識食補血米，控重健康有營

肺炎肆虐，過年期間少出街防止感染病菌，留喺屋企無所事事，食嘢消遣。食得多，欠運動，唔覺意肥咗，有人即時少食飯減磅。一向以來，唔少人為減肥而刻意減少食飯或澱粉質，雖然短期見效，但長久對身體唔好，尤其女性，有機會因欠米氣而脾氣虛，造成不孕。

米氣養命

近年，大眾飲食習慣出現改變，由以往米飯係主食，變成依家愈多愈多人鍾意主餐食麵。有人選擇少食飯或唔食飯，因為覺得飯含澱粉質，澱粉質係碳水化合物一種，碳水化合物係能量主要來源，食得多會累積成為脂肪。但事實係長期缺少足夠碳水化合物會影響身體機能，令人覺得疲倦。從中醫角度，五穀係生命泉源，五穀係養命嘅，而食飯令人有「米氣」。當米氣不足，身體會使用備用嘅脾氣。脾臟主管消化代謝，當脾氣虛，代謝慢就唔容易瘦，而且脾虛血都跟住虛，女性經期受影響，嚴重可能不孕。

補血米營養豐富

近年，愈來愈多人唔食飯改食麵，麵多數由小麥製成，但有生機飲良專家話，麵粉含麩質，亞洲人對麩質過敏比例高，再加上麵粉多經過漂白，或加入添加劑、改良劑等加工，營養有可能流失；此外小麥經加工後屬精緻澱粉，食咗對健康無益。反之，米嘅製作過程較單純，而且米有多種，唔只白米，仲有有色嘅「補血米」，有助養氣！補血米包括紫糯米和黑米，含有微量營養，對人體好。紫糯米含膳食纖維、鉀、鈣、維他命B1、B2、葉酸等，以及鐵、鋅、磷等礦物質，食起嚟煙韌Q軟彈牙。紫糯米含有花青素，具抗衰老保健功效，故又稱「長壽米」。黑米含有豐富嘅花青素和膳食纖維，不過由於口感偏硬，不太容易消化。

所以呢，咪諗住唔食飯可減肥，其實唔食飯就算短期瘦到，長遠都對身體唔健康。減肥黃金法始終係食飲有節，加上適量運動。

你或會有興趣的相關文章：

新春難拒美食誘惑  事後唔食晚餐減肥得唔得？

飲汽水好易肥！ 原來碳酸作怪令人快肚餓

TEXT: MaryLin