辦公位坐得唔舒服 搵出上班族周身痛癥結| likemagazine.com.hk
Beauty & Health
辦公位坐得唔舒服  搵出上班族周身痛癥結

辦公位坐得唔舒服 搵出上班族周身痛癥結

唔少上班族都有呢度痛嗰度痛問題,痛位包括肩頸、腰背,甚至膝頭,就算平時已有做運動,亦有去保健按摩或治療,問題依然,久唔久痛又發作。搞極都唔好,唔係治療未到位,亦未必係運動做得唔足夠,更唔好賴風水唔好,而係一個好多人都忽略嘅重點─公司張辦公枱和凳。當位置、高度等唔啱你,你迫住用一個唔好嘅姿勢坐,日積月累,就容易肌肉痠痛、手腳麻痛等。痛症根源唔改善,無論做幾多治療或運動都唔會好,身體不適持續,拉低工作效率。

 

上班族每日坐喺辦公枱前工作逾8小時,坐得唔舒服,周身痛真係好惡頂。究竟私家辦公位常見出現咩問題?

 

1 有轆凳太滑

好多Office內,上班族都獲配一張有 轆凳,本來呢款凳係幾方便,但原來好傷腰和腳。因為有轆,唔可以固定,所以身體自己悄悄用力定張凳,令你可以繼續工作,腰和小腿會不知不覺間用多力嚟穩定。可以嘅話,又無需要用嘅話,換走張有轆凳,對減痛有幫助。無辦法換,又唔想張凳咁滑,成日移位,建議將網球剪開,套住個轆,減少滑動。

 

2 凳過矮或高

凳嘅高度,對坐姿舒適度好重要。凳太矮,腰椎與骨盆嘅壓力會增加,膝關節都會因為彎曲過度而讓髕股骨關節有過度壓迫。凳過矮,相對嚟講枱會比較高,工作時,你要將肩膀提高,時間耐咗容易痠痛。相反地,凳調校得太高,雙腳要墊起腳尖先掂到地,或者膝關節要過度彎曲先可以令腳放喺凳腳上,可能會造成小腿過度緊繃,以及骨盆過度前傾,呢個時候枱相對較矮,令你要保持駝背姿勢工作。張凳幾高至啱呢?最適合高度係當你坐直,腰挨住凳背,你雙手可以輕鬆自然咁喺枱上做嘢。身形較矮細,發現坐凳後腳懸空,建議枱底放個腳踏墊一墊。如果身形高,已調校凳嘅高度,坐凳後枱仍太低,折衷方法係搵嘢墊高張枱。

 

3 坐凳未坐滿

講到坐姿,除咗腰背要直外,其實坐滿張凳都係重點。好多人坐凳只係坐一邊,令腰部懸空,時間耐咗出現酸痛。坐凳時,先坐滿張凳,然後讓整條脊椎挨喺椅背上。有需要嘅話,先加椅背墊嚟支撐後腰位。

 

4 手肘冇依靠

長時間坐喺枱前工作,若果手肘無依靠,肩膀嘅肌肉要長時間出力拉住手臂,好容易出現肩頸痠痛,亦對頸椎唔好。你可以將手放喺張凳嘅扶手上或枱面上。若果係放喺凳嘅扶手,扶手高度要高整到手可以自然垂放。

 

電腦太高或低

電腦螢幕位置唔啱,令你唔可以直視,而要駝背、烏龜伸頸咁睇電腦,長時間保持呢個錯姿勢,頸、胸椎、肩膀、腰椎都受傷,唔痛就怪。電腦位置正確高度,係當你坐低後,可以直視到往下一啲。調校好高低,就要調整一下遠近。電腦唔一定放喺枱邊,若覺得太遠,令你要傾前身睇,就應該將部電腦放近啲。

 

 

你或會有興趣的相關文章:

上班族難言之隱  便秘少食7類食物

久坐唔止養出豪華臀 日坐8小時以上更易憂鬱

 

TEXT: MaryLin

相關文章
恒常做站立前彎練習 | 舒展筋骨平靜身心恒常做站立前彎練習 | 舒展筋骨平靜身心 最近難入眠瞓得唔好?│睡前瑜伽提升睡眠質素最近難入眠瞓得唔好?│睡前瑜伽提升睡眠質素 晨早起床做瑜伽│新一天由陽光好心情開始晨早起床做瑜伽│新一天由陽光好心情開始 向日本OL偷師!纖體美肌首選小球藻向日本OL偷師!纖體美肌首選小球藻 月經期間的紓緩練習 | 靜心調理經期緩腰痛月經期間的紓緩練習 | 靜心調理經期緩腰痛