打邊爐注意事項 蘸雞蛋食高風險 蝦啱啱轉紅未食得| likemagazine.com.hk
Beauty & Health
打邊爐注意事項	 蘸雞蛋食高風險	蝦啱啱轉紅未食得

打邊爐注意事項 蘸雞蛋食高風險 蝦啱啱轉紅未食得

氣候變化,今年香港冬天熱到離譜!終於等到呢幾日溫度降番啲,涼涼地最啱打邊爐。打邊爐時經常有人問:啲肉熟未?使唔使蘸蛋?湯面浮起泡泡要唔要撇走?所謂禍從口入,唔想因為貪一時口福而染病,打邊爐必要小心處理食物。

 

生雞蛋有菌

首先講下好多人嘅打邊爐習慣─蘸雞蛋。唔少人話咁食至係識食,因為食物蘸上生雞蛋液後,入口更滑,而且又可令本來熱辣辣嘅食物無咁熱,可以即時放入口食,相信「無咁熱氣」。不過未經煮熟嘅雞蛋或者帶菌,例如沙門氏菌、禽流感、痢疾等,對健康構成風險。另外,有醫生指出,打邊爐時常有海產類食材如蝦、貝殼類等,如果海產未經完全煮熟,再蘸生雞蛋,兩者之中嘅細菌或會造成交叉感染。

 

若果堅持要蘸雞蛋食,又要食得安全放心,最好食用可供生食嘅雞蛋。日本有些雞蛋係標明可生食,因為雞蛋由採蛋、清洗,殺菌至包裝,全部不經人手,而且經過沙門氏菌檢驗。只要喺雞蛋上標示嘅最佳食用限期內食用,就可以生食;過咗最佳食用限期,就要整熟食。

 

肉熟會縮小蜷曲

打邊爐嘅樂趣之一係夠簡單,唔使廚藝,食物淥熟就食得。但每次總有人問:呢個熟未?呢個食得未?要知道放落爐內嘅肉類和海產熟未,辨別方法好簡單。一般海鮮煮熟後,顏色會變成實色、質地變得硬身。例如蝦,等蝦殼徹底變紅、蝦肉變白和不透明後先至食。蝦啱啱轉紅時仲未食得架,應該多煮5分鐘先好食。至於肉食,當肉片轉成棕色及縮小蜷曲,代表已煮熟可以食。打邊爐嘅肉食以切成薄片較理想,可以快熟啲,並減少出現外面熟透裡面未熟嘅情況。肉丸餃子放湯後,要等到完全浮起先好食。尤其烚餃子而內餡含肉要俾啲耐性,見到餃子浮起,餃皮徹底由粉白色變透白先好撈起。

 

浮面泡泡蛋白質

唔知大家有無發現,放肉落鍋後,湯面慢慢會浮起一層白灰色泡沫。呢啲其實係肉類殘留嘅血水、雜質和可溶性蛋白質,雖然食咗無問題,但可能有陣肉腥騷味,想湯底清啲,食味好啲,建議將呢啲泡泡撇走。

 

 

 

TEXT: MaryLin

相關文章
魚油VS 魚肝油│唔一樣架!營養成分大不同魚油VS 魚肝油│唔一樣架!營養成分大不同 周末冷峰到氣溫降│兩招保暖強身防病周末冷峰到氣溫降│兩招保暖強身防病 抱B用錯力或常用滑鼠易患「媽媽手」                           中醫教3個動作放鬆止痛抱B用錯力或常用滑鼠易患「媽媽手」 中醫教3個動作放鬆止痛 香港公共廁所勁污糟   如廁後用梘液洗手保健康         香港公共廁所勁污糟 如廁後用梘液洗手保健康 武漢肺炎喺哺乳類動物傳播│北京寵主瘋搶狗口罩護狗武漢肺炎喺哺乳類動物傳播│北京寵主瘋搶狗口罩護狗 沖繩人長壽同飲食有關   高碳水化合物低蛋白質沖繩人長壽同飲食有關 高碳水化合物低蛋白質 洗碗海綿藏菌逾3百種                              定期更換咪等到發臭先扔洗碗海綿藏菌逾3百種 定期更換咪等到發臭先扔 天氣凍飲杯熱飲暖下身                              揀錯飲品手腳易冰冷   天氣凍飲杯熱飲暖下身 揀錯飲品手腳易冰冷