食紅棗補血攝鐵量有限! | likemagazine.com.hk
Beauty & Health
食紅棗補血攝鐵量有限!

食紅棗補血攝鐵量有限!

女生每個月都失血,若果日常飲食又失衡,而且鍾意食飯時飲杯咖啡或茶,好易因為攝取唔夠鐵質,出現疲憊乏力、手腳冰冷、頭暈等情況。有啲阿媽見阿囡成日面青青,就會啟動「傳統智慧」煲紅棗水,話紅棗可補血,多飲有益。紅棗被視為補血聖品,但從營養學角度,紅棗所含嘅鐵質其實唔算多,每100克只含2.3毫克鐵質,甚至比紅豆(100克含3.1克鐵質)仲要少。

 

紅棗助養血非補血

坊間流傳紅棗補血,理論來自中醫藥學說。不過台灣有中醫師指,喺大多數中藥相關著作裡,紅棗從來唔係被歸類於補血養血嘅藥物,而係「補氣類」。紅棗在中醫藥上嘅用途,可以概括為補中益氣,養血安神,緩和藥性。直接講,紅棗只係養血,而唔係補血。中醫藥裡,補血嘅中草藥有當歸、何首烏、地黃、芍藥、阿膠等。紅棗養血,但唔可以單獨用,必要配合其他中藥如阿膠、地黃等。所以如果一心諗住飲下紅棗水就可以補血,未必太天真!而且紅棗外皮太韌,不好消化,脾胃虛弱者食用要注意。建議大家可以將紅棗蒸熟或煮粥再進食,或可將紅棗撕成小片狀,再以熱水浸泡為紅棗茶享用。

 

海產肉類更補血

另一個紅棗唔係補血最佳食品嘅理由,係紅棗所含嘅鐵質屬「非血基質鐵」,非血基質鐵主要來源自植物。人體吸收非血基質鐵需經一連串分解及轉換過程,而且過程容易受到酸鹼值及多種物質如:磷酸鹽、草酸鹽、單寧、多酚類等影響,坦白講,即係難吸收。來自動物嘅血基鐵質吸收率較高,可達1535%,而且不容易受飲食中其他營養素影響。根據衛生署資料,女性一天宜攝取18毫克鐵質,男士則宜攝取8毫克鐵質。所以,缺鐵者靠進食含鐵質豐富嘅動物性食物來攝取比較理想,例如:蜆、豬潤、蠔、豬紅、青口、駝鳥肉、牛肉、羊肉、鴨肉、豬肉等。至於素食者要補血,含豐富鐵質嘅植物性食物選擇多的是,點止得紅棗?每百克黑芝麻含22.7毫克鐵質;每百克腐竹含16.5毫克鐵質;每百克黑豆含7.2毫克鐵質;每百克黑木耳含5.5毫克鐵質;每百克杏仁含3.2毫克鐵質。

 

 

你或會有興趣的相關文章:

喝了這四款養顏糖水,秋冬滋補又美容!

港女缺鐵易疲倦臉青青  食飯配茶啡影響鐵吸收

 

 

TEXT: MaryLin

相關文章
少運動下身循環慢現痛症 | 簡易瑜伽提升髖部靈活性少運動下身循環慢現痛症 | 簡易瑜伽提升髖部靈活性 打造超強體質!小球藻 護好「腸道」,排走「重金屬」, 補充「均衡營養」!打造超強體質!小球藻 護好「腸道」,排走「重金屬」, 補充「均衡營養」! 天氣熱食酸甜味菜式更開胃│3道青森蘋果入饌簡易菜式天氣熱食酸甜味菜式更開胃│3道青森蘋果入饌簡易菜式 在家工作的瑜伽Break | 大腦放鬆身體動起來 在家工作的瑜伽Break | 大腦放鬆身體動起來 戴口罩都仲未放心?「減低身邊病毒量」才是上上策戴口罩都仲未放心?「減低身邊病毒量」才是上上策 30分鐘哈達瑜伽│平衡陰陽能量促身心健康30分鐘哈達瑜伽│平衡陰陽能量促身心健康 習慣對不好的事批判│感恩靜心練習 回到喜悅習慣對不好的事批判│感恩靜心練習 回到喜悅 月經期間的紓緩練習 | 靜心調理經期緩腰痛月經期間的紓緩練習 | 靜心調理經期緩腰痛