冬天日照時間短，而且陽光唔太猛烈，平時有做開家頭細務嘅你，應該發覺每次洗衫後，啲衫好難晾得乾！其實冬天衫較夏天衫厚，預咗要多啲時間先晾乾，但好似無論點晾，褲袋、衞衣頂帽、衣袖、腋下位等摸上手仍然有濕氣。究竟有乜方法可以令啲衫快啲吹得乾呢？
保留足夠通風空間
洗咗嘅衫想快啲乾，秘訣就係通風。衣物清洗後晾掛，當周遭空氣乾燥，衣物嘅水分就會蒸發，喺表面形成水蒸氣層。如有風吹來，就會吹散蒸氣層，令衣物變乾。所以掛晾衣物時，衣物之間必要留有適當空間，保持空氣流通，千祈唔好掛到密密麻麻，亦唔好為慳位疊埋掛，必要一件一件分開。
多用一個衣架掛衫
另外，掛連帽衞衣，可以多用一個衣架，勾起頂帽，避免帽壓住衫背，帽難乾，衫背又唔乾。掛褲時，宜翻轉底面，底向外，先可以加速吹乾褲袋。此外，掛衫無人規定只可以用一個衣架。多用一個衣架夾住褲和裙頭，製造筒形空間，風可以吹入褲和裙內，都會快啲吹得乾。
長短交錯排列
仲有一個小貼士，就係留意衣物嘅長短。衣物一字排開晾掛時，若能夠長短交錯咁排，有助增加通風面積，晾乾速度會變快。
你或會有興趣的相關文章：
冷衫縮水有得救 教你水洗手洗冷衫方法
洗衣機洗衫有機會染菌 洗衣劑槽密封膠圈易藏菌
TEXT: MaryLin