企近微波爐安全嗎? 叮液體最高危突爆致燙傷| likemagazine.com.hk
Beauty & Health
企近微波爐安全嗎?	叮液體最高危突爆致燙傷

企近微波爐安全嗎? 叮液體最高危突爆致燙傷

午飯時間,公司幾個微波爐全力叮飯。路經微波爐附近,明顯感到暖流。同事A見狀好心提醒:「唔好行咁近,小心輻射!」微波爐會洩漏幅射呢個話題一直流傳,之前已經同大家分享咗,食微波爐食品係安全嘅,唔會食埋幅射落肚。咁企喺微波爐旁邊,又係咪堅安全呢?

 

安全設計唔會洩微波

微波爐係一項世紀發明,幫助好多上班族解決飯餐問題,亦簡化和加快咗烹調程序,令好多懶人都享受到入廚樂。微波爐嘅操作原理,之前講過,有興趣重溫,可以睇呢篇文:《微波爐加熱食物唔健康? 美國FDA:保留更多營養》。食落肚無問題,有人又會問,行近微波爐係咪安全呢?大家可以放一萬個心,基本上係無問題。根據美國FDA,因為微波爐幅射而受傷嘅個案少之有少。但係,大家使用微波爐都有安全守則,以策健康安全。

 

微波爐加熱食品嘅原理係透過微波令食物內水分子摩擦震動而生熱,食物得以熟熱起來。同樣道理,微波都可以加熱人體組織,令我們燙傷,不過大家唔使太擔心,因為呢個情況只會出現喺極大微波洩漏情況。原來一般家用微波爐喺設計上已作出安全保障,包括爐內有平滑金屬壁、門上有金屬網、安全鎖等,確保不會出現微波洩漏。話雖如此,為保險計,都唔建議大家挨近微波爐,最好同微波爐保持半米左右距離。另外,微波爐運作期間,盡量唔好直視微波爐,以免眼球水晶體受損。如發現微波爐有損毁、門變曲、有隙縫,千祈唔好用,快手換個新。定期檢修係保障安全嘅重要一環。

 

意外來自錯誤使用

其實,使用微波爐最有可能出現嘅危險係燙傷。除咗唔小心掂到已加熱嘅容器外,最多人忽視係用微波爐加熱液體後出現嘅突沸現象。用微波加熱液體,液體有可能超過沸點,出現過熱。例如叮咖啡,從微波爐拎出嚟時睇落好正常,但當加入糖或奶時,就會出現微小氣泡,造成水再次沸騰而向四周爆開現象,一唔小心就會燙傷。唔想遇上呢個意外,首先注意加熱時間唔好太長;另外,叮液體前先攪拌或微微搖晃杯子或碗,增加容器內氣泡,當液體煮過沸點時,藉氣泡而煮開,有助減低突爆情況。或者喺杯和碗內加隻木湯匙先叮,都有助釋放熱能。叮熱食物方面,因為微波加熱會令水變成蒸氣,急速膨脹嘅氣體會令內部壓力急升,所以放入爐叮嘅食物盒唔好冚實蓋,唔好叮雞蛋、帶皮水果或有包裝袋嘅食物,以免爆開生危險。

 

 

你或會有興趣的相關文章:

洗碗海綿藏菌逾3百種  定期更換咪等到發臭先扔

毛巾發霉起黑點發臭  5個清洗毛巾要點

 

 

TEXT: MaryLin

相關文章
新春返內地防肺炎外   鼠疫都要留神                  新春返內地防肺炎外 鼠疫都要留神 疫情影響捐血人數減│血庫告急│怕人多聚集可先預約疫情影響捐血人數減│血庫告急│怕人多聚集可先預約 防疫外出戴口罩             戴一個外科口罩就足夠防疫外出戴口罩 戴一個外科口罩就足夠 Party 後肌膚SOSParty 後肌膚SOS 【醫生提醒】亂浸溫泉隨時感染性病?2 大高危染病位唔好坐【醫生提醒】亂浸溫泉隨時感染性病?2 大高危染病位唔好坐 辦公位坐得唔舒服  搵出上班族周身痛癥結辦公位坐得唔舒服 搵出上班族周身痛癥結 冬天腳仔凍冰冰瞓唔到                              著襪瞓生蘿蔔仔香港腳冬天腳仔凍冰冰瞓唔到 著襪瞓生蘿蔔仔香港腳 巴西發現神秘新病毒│9成基因無法辨識│恐存巨大變異巴西發現神秘新病毒│9成基因無法辨識│恐存巨大變異